Azərbaycanın 3990 İTKİNİ VAR

Avqustun 30-u dünyada Beynəlxalq İtkinlər Günü kimi qeyd edilir. İtkinlər gününün təsis edilməsi ilə bağlı ilk təşəbbüs 30 avqust 2007-ci ildə Filippində itkin düşmüş şəxslərin ailə üzvləri tərəfindən irəli sürülüb. Bir il sonra, 2008-ci ilin avqust ayında bu təşəbbüs dünya ictimaiyyəti tərəfindən ciddi dəstək alıb və səbəbindən asılı olmayaraq itkin düşmüş bütün şəxslərin anım gününün qeyd edilməsinin zəruriliyinə dair ümumi fikir formalaşdırılıb.

BMT Baş Assambleyası tərəfindən 21 dekabr 2010-cu ildə qəbul edilmiş Qətnamə ilə hər ilin 30 avqust tarixinin Beynəlxalq İtkinlər Günü kimi qeyd edilməsi qərara alınıb.

İnsanların itkindüşmə səbəbləri müxtəlifdir. Lakin ötən dövrlərin tarixi göstərib ki, ən çox itkindüşmə halları silahlı münaqişələr zamanı baş verir.

News365.az-ın Azərbaycan Respublikası Əsir və itkin düşmüş, girov götürülmüş vətəndaşlarla əlaqədar Dövlət Komissiyasından əldə etiyi məlumata görə, Ermənistanın Azərbaycana qarşı hərbi təcavüzü nəticəsində 3990 nəfər itkin düşmüş şəxs kimi qeydiyyata alınıb.

Onlardan 3984 nəfər Birinci Qarabağ müharibəsi zamanı itkin düşüb. Həmin şəxslərdən 3205 nəfər həbçilər, 779 nəfər (71 uşaq, 284 qadın, 316 qoca) mülki insanlardır.

Birinci Qarabağ müharibəsi itkinlərinin 3699 nəfəri kişilər,  285 nəfəri qadınlardır.

İkinci Qarabağ müharibəsində itkin düşmüş şəxslər isə 6 nəfər təşkil edir ki, onların hamısı həbi qulluqçulardır.

Ermənistan bu şəxslərin taleyi barədə məlumat verə bilmir.