Azərbaycanda əmək bazarı: Yüksək və aşağı maaşlı sektorlar üzə çıxdı

Ölkədə muzdlu əmək bazarında gəlirlərin artması müşahidə olunsa da, sektorlar üzrə maaş fərqləri hələ də ciddi şəkildə qalmaqdadır. Dövlət Statistika Komitəsinin açıqladığı son rəqəmlərə əsasən, ilin ilk rübündə orta aylıq nominal əməkhaqqı ötən ilin eyni dövrü ilə müqayisədə 6,2 faiz artaraq 1151 manata yüksəlib.

News365.az-ın məlumatına görə, iqtisadçı, deputat Vüqar Bayramov bildirib ki, hazırda ölkədə əmək müqaviləsi ilə çalışanların sayı 1 milyon 797 min nəfərdir. Onların 869 mini dövlət sektorunda, 928 mini isə özəl sahədə fəaliyyət göstərir.

Deputatın sözlərinə görə, maaşların sahələr üzrə bölgüsündə ciddi fərqlər qalmaqdadır. Ən yüksək gəlirlər ənənəvi olaraq mədənçıxarma sənayesində qeydə alınır. Bu sektorda orta aylıq əməkhaqqı 4581 manat təşkil edir ki, bu da ölkə üzrə orta göstəricidən təxminən 4 dəfə çoxdur.

Maliyyə və sığorta sektorunda orta maaş 2814 manat, bank sektorunda isə ikinci ən yüksək gəlir səviyyəsi müşahidə olunur. Ümumilikdə iqtisadiyyatın bir sıra sahələrində əməkhaqları orta göstəricidən yüksək olsa da, əksər sektorlarda vəziyyət fərqlidir.

Ən aşağı əməkhaqqı kənd təsərrüfatı, meşə təsərrüfatı və balıqçılıqda qeydə alınıb — 720 manat. Ticarət və nəqliyyat vasitələrinin təmiri sahəsində bu göstərici 768 manat, təhsil sahəsində 824 manat, elmi sahədə isə 1048 manatdır.

Vüqar Bayramov qeyd edib ki, əməkhaqqı fərqlərinin sektoral təhlili gələcək tənzimləmələr üçün mühüm əhəmiyyət daşıyır. Onun fikrincə, maaş siyasətində optimallaşdırma və daha ədalətli bölgü prioritet olaraq qalmalıdır.

Rəqəmlər göstərir ki, ümumi artıma baxmayaraq, Azərbaycanda gəlirlər işlənilən sahədən asılı olaraq kəskin fərqlənir: yüksək maaşlı sektorlarla aşağı gəlirli sahələr arasında ciddi uçurum mövcuddur.

News365.az