ABŞ niyə güclüdür?

“İnsanlıq üçün ana və vətən nə qədər önəmlidirsə, iqtisadiyyat üçün rəqabət o qədər önəmlidir. İkinci olmayan yerdə birinci məhv olur”.

Bunu News365.az –a söhbətində iqtisadçı ekspert Eldəniz Əmirov deyib. O bildirib ki, hələ bir müddət əvvəl qeyd etmişdik ki, rəqabət mühitinin qorunması və inkişafı dövlətin əsas vəzifələrindən biridir:

“Zərurət yarandıqda, inhisarçı strukturların parçalanması belə rəqabətin təmin olunması baxımından legitim və vacib addım hesab edilməlidir. Bu yanaşma artıq dünyada praktiki təcrübə kimi tətbiq olunur.

Son nümunə hazırda ABŞ-da yenidən müşahidə olunmaqdadır. ABŞ-ın Virciniya ştatının Şərq Bölgəsi üzrə Dairə Məhkəməsi “Google”un onlayn reklam serveri bazarında qəsdən inhisar gücü əldə etdiyi və bu gücü saxladığı qənaətinə gəlib. Hakim Leoni Brinkema 115 səhifəlik qərarında şirkətin rəqabətə qarşı addıımlar atdığını və arzu olunan məhsul xüsusiyyətlərini bazardan çıxararaq üsttün mövqeyini daha da gücləndirdiyini qeyd edir.

Görünən odur ki, yaxın vaxtlarda bu istiqamətdə daha ciddi hüquqi proseslər başlayacaq. Gələn həftə Vaşinqtonda keçiriləcək məhkəmədə “Google”un “Chrome” brauzeri və axtarış bazarındakı dominansı ilə bağlı yeni iddialar müzakirə olunacaq.

Bu hadisə bir daha göstərir ki, rəqabətin təmin olunması üçün dövlətlər güclü hüquqi və institusional addımlar atmalıdır. Bu, yeni subyektlərin yaranması, innovasiyanın təşviqi və istehlakçının mənafeyinin qorunması baxımından əvəzsizdir.

Həm də bu hadisə "ABŞ niyə güclüdür?" sualının ən sadə cavabıdır”.

News365.az