İşə qəbul zamanı kollec məzunlarından attestat tələb olunması QANUNİDİR?

Azərbaycanda bəzi müəssisələr işə qəbul zamanı lazım olan sənədlərlə yanaşı 11 illik attestatı da tələb edir. Bu isə işə qəbul olmaq istəyənlər arasında narazılığa səbəb olur.  

Maraqlıdır ki, işə qəbul zamanı XI sinfin attestatı ilə bağlı tələbi nədən irəli gəlir?

Önəmli olan şəxsin XI sinifə qədər təhsil almasıdır, yoxsa işlə bağlı bacarıqlı olması?

Mövzu ilə bağlı təhsil eksperti Elmin Nurizadə bildirir ki,  işə qəbul zamanı XI sinfin attestatının tələb edilməsinin səbəbi işə götürülən şəxsin tam orta təhsil alıb-almadığının, savadlılıq dərəcəsinin bu mərhələsinə cavab verib-verməməsi məntiqinə əsaslanır.

“Mənə görə işəgötürülən şəxsi 11 illik attestat sənədi deyil, onun aidiyyəti ixtisas, ona tapşırılan işə nə dərəcədə bələd olması, bacarığının necə olması daha maraqlı və vacibdir. Amma yenə də əksini düşünənləri də qınaya bilmərik. Məsələnin digər tərəfi IX sinifdən məktəbdən çıxaraq natamam orta təhsil attestatı ilə peşə təhsil müəssisəsi, yaxud kollec oxuyan şəxsin müəssisəyə müraciət edən zaman sırf bu səbəbdən çətinlik yaşaması fikri ilə razı deyiləm. Çünki o, orta təhsilini IX siniflə tamamlayır.

Amma sonrakı mərhələdə aldığı "peşə diplomu", yaxud subbakalavr diplomu XI sinifi bitirmək haqqında attestatı nəinki əvəzləyir, hətta ondan da üst sənədə çevrilir. Ona görə də biz sırf bu istiqamətdə hər hansı problemin olacağını düşünmürük”.

Elmin Nuri məktəb təhsilini natamam bitirib, peşə təhsil müəssisəsinin, yaxud kollecin diplomu ilə işə müraciət edən şəxsdən 11-ci sinifin attestatının tələb olunmasını yolverilməz hesab edib.