"Bu gün var olduqları üçün yəhudilər türklərə minnətdar olmalıdırlar"- Hərbi ekspert

İsrailin baş naziri Benyamin Netanyahunun “erməni soyqırımı” barədə söylədikləri və bunu şəxsən qəbul etdiyini söyləməsi siyasi gündəmə bomba kimi düşdü. Bu açıqlama təkcə Türkiyədə deyil, həm də Azərbaycanda ciddi narahatlıq və təəssüf doğurdu.

Məsələ ilə bağlı News365.az -a danışan hərbi ekspert Tərlan Eyvazov  deyir ki,  Azərbaycan-Türkiyə-İsrail uçbucağı heç zaman bir-birinə təsirsiz ötüşməyib:

“Amma bizimlə İsrail arasında münasibətlər normal inkişaf etsə də Türkiyə ilə İsrail arasında zaman-zaman mübahisələr gedir. Lakin baş verənlər heç zaman İsrail-Türkiyə iqtisadi münasibətlərinə ciddi təsir göstərməyib. Əslində münasibətlər bütün sahələrdə davam edir. Ancaq Türkiyənin müstəqil siyasəti və müsəlman ölkələrinə havadarlıq etməsi Netanyahu və digərlərinin narahat edib. Nəzərə alaq ki, İsrail dövləti yaranandan bəri Yaxın Şərqdə münaqişə dayanmayıb və bu gün davam edir. Baxmayaraq ki, İsrail dövləti yarananda orada cəmi 600 min yəhudi var idi. Amma bu gün yəhudilərin saayı 10 milyona çatıb. Nəzərə alaq ki, gələn yəhudilərin çoxu yerli vəziyyəti düzgün qiymətləndirə bilməmələrinə görə və yerli sakinlərin ənənələrinə biganə yanaşmaları səbəbilə tez-tez toqquşmalar olur. Qanlı toqquşmalar səbəbilə yerli fələstin əhalisi qonşu dövlətlərə pənah aparıb. Xüsusilə də İordaniyaya. Beləcə Qəzza bölgəsi süni şəkildə və haqsızcasına yəhudiləşdirilir”.

Netanyahunun Türkiyə ilə bağlı dediklərinə gəldikdə isə müsahibimiz qeyd edib ki, yəhudilər bu gün var olduqları üçün türklərə minnətdar olmalıdırlar:

“XVI əsrdə Osmanlı Sultanı Sultan Səlim yəhudilərin bəlkə də yer üzündən yox olmasının qarşısını alan şəxs kimi tarixə düşüb.  O dövrdə bütün Avropada yəhudilər lənətlənir, odda yandırılır, ən yaxşı halda isə sürgün edilirdi. Məhz o zaman Sultan Səlim 400 min yəhudini avropalıların cəngindən xilas edərək gəmilərlə əvvəlcə indiki Türkiyəyə, daha sonra isə Yaxın Şərqə köçürdü.  Ümumiyyətlə istər sultanlıq, istərsə də cümhuriyyət dönəmində türklərin yəhudilərə qarşı münasibəti yaxşı olub. Bütün bunlardan sonra Netanyahunun ritorikaları təəssüf doğurur. Bu vaxtadək İsrail Knesseti “eməni soyqırımı”nı müzakirə və qəbul etməyib. Lakin siyasi məqsədlər üçün bu məsələ zaman-zaman İsraildə gündəmə gətirilib. Və Netenyahunun da məlum açıqlamaları da siyasi məqsəd daşıyır. Əslində ermənilərin vəziyyətə və tarixi keçmişi bu adamı qətiyyən narahat etmir. Sadəcə bu fikirlərlə o rəsmi Ankaraya təzyiq göstərmək istəyir. Amma bununla belə bir məsələyə diqqət etməliyik ki, Netenyahu İsrailin həm baş naziri, həm də iqtidar partiyasının rəhbəridir. Ona görə də onun dedikləri İsrailin rəsmi mövqeyi kimi qiymətləndirilməlidir. Təbii ki, biz də bundan nəticə çıxartmalıyıq”.

News365.az