Təhsil rəsmisinin oğlunun qatilinə də əfv olundu – Namus zəminində cinayət
Bakıda 23 yaşlı əmisi oğlunu qətlə yetirən Elşən Nəzir oğlu Nəsirov da əfv edilib.
News365.az xəbər verir ki, 2015-ci ildə həbs edilən, 12 il cəza alan Elşən Nəsirov azadlığa buraxılıb.
Qeyd edək ki, hadisə 2015-ci ilin noyabr ayında Nizami rayonu, Qara Qarayev 55 ünvanında baş verib. Lerik rayon sakini, 23 yaşlı Nəsirov Elşən Nəzir oğlu əmisi oğlu Elnur Balaşirin oğlu Nəsirovun başını kəsərək qətlə yetirib. Hadisədən sonra E.Nəsirov Nəsimi Rayon Polis İdarəsinin 25-ci Polis Bölməsinə könüllü təslim olub.
Araşdırma zamanı məlum olub ki, E.Nəsirov hadisəni namus üstündə törədib. Belə ki, Elnur Nəsirovun öz əmisi qızı ilə ailə həyatı quracağı gözlənilsə də, o, təhsil aldığı universitetdə birlikdə oxuduğu bir qızla evlənib. Onun bu hərəkəti əmisi oğlu Elşən Nəsirov tərəfindən etirazla qarşılanıb. Nəticədə Elşən Nəsirov əmisi oğlunu öldürərək qisas alıb.
O, Cinayət Məcəlləsinin 120.1-ci (qəsdən adam öldürmə, yəni digər şəxsi qəsdən həyatdan məhrum etmə) maddəsi ilə ittiham olunub Bakı Ağır Cinayətlər Məhkəməsinin hökmü ilə 12 il müddətinə azadlıqdan məhrum edilmişdi.
Xatırladaq ki, öldürülən gənc Lerik rayon Təhsil Şöbəsinin müdiri işləmiş Balaşirin Nəsirovun oğludur. Balaşirin Nəsirovun qardaşı, yəni qətl törətməkdə şübhəli bilinən şəxsin atası Nəzir Nəsirov Bakıda bizneslə məşğul olur.
