Sərhəd təhlükəsizliyi və regional çağırışlar gündəmdə

Cəmiyyət

09:50

Azərbaycanın regional və qlobal proseslərə münasibəti və xarici siyasət prioritetləri beynəlxalq müzakirələrin əsas mövzularından biri olaraq qalır. Prezidentin çıxışında səsləndirilən fikirlər də ölkənin dəyişən geosiyasi vəziyyətdə mövqeyini və təhlükəsizlik çağırışlarına yanaşmasını bir daha gündəmə gətirib. Politoloqlar isə bu çıxışları Azərbaycanın gələcək strateji xəttinin mühüm göstəricisi kimi qiymətləndirirlər.

Politoloq Elşən Mustafayev prezidentin çıxışında regional və qlobal proseslərlə bağlı Azərbaycanın mövqeyini şərh edib.

O, News365.az-a açıqlamasında bildirib ki, regionda baş verən hadisələr Azərbaycanın xarici siyasətinə və təhlükəsizlik prioritetlərinə birbaşa təsir göstərir.

Ekspertin sözlərinə görə, xüsusilə İranla sərhəd bölgədə baş verən proseslər ölkəmiz üçün potensial risklər yarada bilər və bu amillər diqqətlə izlənilir. O qeyd edib ki, Azərbaycan bu kimi çağırışlara qarşı öz mövqeyini aydın şəkildə ortaya qoyur və təhlükəsizlik məsələlərini prioritet hesab edir.

Politoloq vurğulayıb ki, qlobal iqtisadi və siyasi proseslər də region ölkələrinə ciddi təsir göstərir. Onun fikrincə, bəzi böhranlar dünya bazarlarında, xüsusilə enerji resurslarının qiymətində dəyişikliklərə səbəb ola bilər və bu, müxtəlif ölkələr üçün həm risk, həm də imkanlar yaradır.

Elşən Mustafayev bildirib ki, Azərbaycan bu proseslərdə öz xarici siyasətini balanslı şəkildə aparır və strateji tərəfdaşlarla əməkdaşlığa xüsusi önəm verir.

O əlavə edib ki, beynəlxalq forumlarda səsləndirilən fikirlər həm ölkənin xarici siyasət kursunun təqdimatı, həm də qlobal miqyasda mesaj xarakteri daşıyır.