Şamaxıda erkən nikah cəhdinin QARŞISI ALINDI

Şamaxıda erkən nikah cəhdinin qarşısı alınıb. Ailə, Qadın və Uşaq Problemləri üzrə Dövlət Komitəsinə daxil olan məlumat əsasında polis əməkdaşları dərhal hərəkətə keçib. Nəticədə azyaşlının nişan mərasimi baş tutmayıb, valideynlər isə inzibati məsuliyyətə cəlb olunub.

Komitənin mətbuat katibi Teymur Mərdanoğlu  bildirib ki, bu kimi hallara qarşı ictimai məsuliyyət artırılmalıdır:

“Məlumata görə, nənə azyaşlı nəvəsini xarici vətəndaşla evlənməyə məcbur edib. Daxil olan siqnal dərhal hüquq-mühafizə orqanlarına ötürülüb və polis əməkdaşlarının müdaxiləsi nəticəsində erkən evlilik baş verməyib".

Onun sözlərinə görə, erkən nikah uşaqların hüquqlarını ciddi şəkildə pozur:

“Unutmayaq ki, erkən nikah uşaqlığın, təhsilin və sağlam gələcəyin əlindən alınması deməkdir. Bu cür addımlar gənclərin psixoloji, sosial və fiziki inkişafına ciddi zərər vurur".

T.Mərdanoğlu əlavə edib ki, məsələ yalnız dövlət qurumlarının deyil, bütün cəmiyyətin üzərinə məsuliyyət qoyur:

“Cəmiyyət olaraq hər birimiz övladlarımızı erkən nikahdan qorumalıyıq. Qızların və oğlanların uşaq yaşda deyil, yetkin və müstəqil olduqları zaman öz seçimləri ilə ailə qurması onların ən təbii haqqıdır".

Komitə nümayəndəsi valideynləri xəbərdar edib ki, azyaşlıların evliliyə cəlb olunması qanunla qadağandır və belə hallara qarşı qəti tədbirlər görüləcək.