Müasir dövrdə gənclər siyasətinin davamlılığı

Mütəmadi olaraq təkmilləşdirilən dövlət gənclər siyasəti gənclərin ictimai-siyasi həyatdakı rolunun artmasına mühüm təsir göstərmişdir

 Müstəqil Azərbaycanın inkişaf strategiyasında gənclər hər zaman əsas prioritetlərdən biri olmuşdur. Məhz dövlətin gənclərə göstərdiyi ardıcıl dəstək və xüsusi diqqətin nəticəsi olaraq bu gün Azərbaycan gəncliyində özünə, öz gücünə və istedadına inam hissi əhəmiyyətli dərəcədə artmışdır. Gənclər artıq cəmiyyətin passiv üzvü deyil, ölkənin sosial, iqtisadi və ictimai-siyasi həyatında fəal rol oynayan əsas aparıcı qüvvəyə çevrilmişdir. Dövlətin gənclər siyasəti hər zaman prioritet məsələ kimi Ulu Öndər Heydər Əliyevin xüsusi diqqət və nəzarətində olmuşdur. Azərbaycanı gənclər ölkəsi, gəncləri isə dövlətin və millətin gələcəyi adlandıran Ümummilli Lider gənc nəslə qayğını heç zaman əsirgəməmişdir. Məhz bu uzaqgörən siyasətin nəticəsi olaraq gənclər cəmiyyətin fəal, təşəbbüskar və aparıcı qüvvəsinə çevrilmişdir.

 Ümummilli Lider Heydər Əliyevin 1993-cü ildə hakimiyyətə qayıdışı ilə ölkədə sabitlik və inkişaf mərhələsi başlanmış, gənc nəslə diqqət dövlət siyasətinin prioritet istiqamətlərindən biri kimi müəyyən edilmişdir. Həmin dövrdən etibarən gənclərin milli ruhda tərbiyə olunması, onların intellektual potensialının artırılması, sosial problemlərinin həlli və ictimai-siyasi proseslərdə fəal iştirakı üçün sistemli tədbirlər həyata keçirilməyə başlanmışdır.

 Ulu Öndərin rəhbərliyi ilə Azərbaycanda müstəqil gənclər siyasətinin hüquqi və təşkilati əsasları formalaşdırılmışdır. Gənclər təşkilatlarının yaradılması və fəaliyyətinin stimullaşdırılması, gənclərin beynəlxalq əlaqələrinin genişləndirilməsi, onların dövlət quruculuğu prosesinə cəlb olunması bu siyasətin əsas istiqamətlərini təşkil etmişdir. 1996-cı ildə keçirilən Azərbaycan Gənclərinin I Forumu gənclərin cəmiyyət həyatında rolunun artırılması baxımından mühüm tarixi hadisə olmuşdur. Bu ardıcıl siyasətin məntiqi davamı olaraq Ulu Öndər Heydər Əliyevin 1 fevral 1997-ci il tarixində imzaladığı Sərəncamla 2 fevral tarixi Azərbaycan Gəncləri Günü elan edilmişdir. Bununla da Azərbaycan MDB məkanında və Şərqi Avropa ölkələri arasında ilk dəfə olaraq Gənclər Gününü təsis edən ölkə kimi tarixə düşmüşdür. Bu qərar gənclərə verilən yüksək dəyərin və onlara olan inamın bariz ifadəsi idi.

 Azərbaycan Respublikasında gənclər siyasətinin sistemli, ardıcıl və məqsədyönlü şəkildə formalaşdırılması Ulu Öndər Heydər Əliyevin adı ilə birbaşa bağlıdır. Ümummilli Lider gəncləri ölkənin strateji inkişaf resursu, dövlətin gələcəyinin əsas təminatçısı kimi dəyərləndirərək onların hərtərəfli inkişafını daim diqqət mərkəzində saxlamışdır. Bu uzaqgörən siyasətin mühüm mərhələlərindən biri də Ulu Öndər Heydər Əliyevin 29 iyul 1999-cu il tarixində imzaladığı “Dövlət gənclər siyasəti haqqında” Fərman olmuşdur. Fərmanla Azərbaycan Respublikasında dövlət gənclər siyasətinin həyata keçirilməsi ilə bağlı tədbirlər planı təsdiq olundu. Bu plan gənclərin təhsil, məşğulluq, sağlamlıq, mənəvi-əxlaqi tərbiyə, yaradıcılıq və ictimai fəallıq sahələrində qarşılaşdıqları problemlərin həllinə yönəlmiş konkret və sistemli tədbirləri özündə əks etdirirdi. Ulu Öndər Heydər Əliyevin gənclər siyasətində mühüm yeniliklərindən biri də bu sahəyə elmi yanaşmanın tətbiq edilməsi oldu.

 Bu gün Ulu Öndərin müəyyən etdiyi strateji xətt Prezident İlham Əliyev tərəfindən uğurla davam etdirilir. Prezident İlham Əliyevin rəhbərliyi ilə həyata keçirilən dövlət gənclər siyasətinin əsas məqsədi gənclərin mövcud potensialının tam şəkildə reallaşdırılması, onların müasir bilik və bacarıqlara yiyələnmiş, vətənpərvər və savadlı kadrlar kimi yetişdirilməsidir. Bu məqsədlə son illər ərzində təhsil sahəsində aparılan islahatlar, beynəlxalq təhsil proqramları, xaricdə təhsil imkanları, innovasiya və startap təşəbbüslərinin dəstəklənməsi gənclərin bilik və bacarıqlarının artırılmasına xidmət edir. Dövlət tərəfindən yaradılan bu imkanlar gənclərdə özünəinamı gücləndirir, onların şəxsi inkişafla yanaşı, ölkənin inkişafına töhfə vermək arzusunu daha da artırır. Gənclər artıq öz gələcəklərini yalnız fərdi uğurla deyil, Azərbaycanın tərəqqisi ilə birgə görürlər.

Prezident İlham Əliyevin gənclər siyasətində mühüm istiqamətlərdən biri də gənclərin vətənpərvərlik ruhunda tərbiyə olunmasıdır. Dövlət proqramları, ictimai təşəbbüslər və milli-mənəvi dəyərlərin təbliği gənclərdə Vətənə bağlılıq hissini gücləndirir. Xüsusilə Vətən müharibəsi dövründə Azərbaycan gəncliyinin göstərdiyi qəhrəmanlıq, fədakarlıq və birlik bu siyasətin real nəticələrini açıq şəkildə nümayiş etdirdi. Bu proses gənclərin təkcə fiziki deyil, mənəvi cəhətdən də möhkəmlənməsinə, milli məsuliyyət hissinin formalaşmasına zəmin yaratdı. Dövlətin gənclərə yönəlmiş siyasətinin mühüm istiqamətlərindən biri də gənc ailələrin sosial təminatının gücləndirilməsidir. Mənzil təminatı proqramları, güzəştli ipoteka kreditləri, sosial layihələr və məşğulluq imkanlarının artırılması gənc ailələrin rifahının yüksəldilməsinə xidmət edir. Bu tədbirlər gənclərin gələcəyə daha böyük inamla baxmasına, cəmiyyətin sağlam sosial təbəqəsinin formalaşmasına şərait yaradır.

 Mütəmadi olaraq təkmilləşdirilən dövlət gənclər siyasəti gənclərin ictimai-siyasi həyatdakı rolunun artmasına mühüm təsir göstərmişdir. Gənclər bu gün dövlət qurumlarında, bələdiyyələrdə, ictimai təşkilatlarda, könüllülük hərəkatlarında və beynəlxalq platformalarda fəal şəkildə təmsil olunurlar. Onların təşəbbüskarlığı, yaradıcı yanaşması və innovativ düşüncəsi ölkənin dinamik inkişafına yeni impuls verir. Bu proses nəticəsində Azərbaycanda kreativ düşüncəyə malik, müasir çağırışlara cavab verən, qlobal trendləri izləyən və eyni zamanda milli kimliyinə sadiq gənclik formalaşmışdır.

 Dövlət gənclər siyasəti müasir çağırışlara uyğun olaraq daha da təkmilləşdirilir, gənclərin təhsil alması, məşğulluğu, sosial müdafiəsi, innovasiya və sahibkarlıq sahəsində fəallığı daim diqqət mərkəzində saxlanılır. Gənclər Fondunun fəaliyyəti, könüllülük hərəkatının genişlənməsi, beynəlxalq proqramlarda iştirak imkanlarının artırılması gənclərə göstərilən dövlət qayğısının real təzahürləridir. Bu gün Azərbaycan gəncliyi savadlı, təşəbbüskar, milli-mənəvi dəyərlərə sadiq və müasir dünyagörüşünə malik bir nəsil kimi formalaşmışdır. Onlar elmdə, mədəniyyətdə, idmanda, informasiya texnologiyalarında və dövlət idarəçiliyində əldə etdikləri uğurlarla ölkəmizi beynəlxalq arenada layiqincə təmsil edirlər. Xüsusilə Vətən müharibəsi dövründə gənclərin göstərdiyi qəhrəmanlıq və fədakarlıq onların Vətənə bağlılığının və milli məsuliyyət hissinin parlaq nümunəsidir.

 Bu gün Azərbaycan gəncliyi dövlətin dəstəyini hiss edən, öz gücünə və istedadına inanan, məsuliyyətli və fəal bir nəsildir. Prezident İlham Əliyevin həyata keçirdiyi uzaqgörən gənclər siyasəti gənclərin potensialının reallaşmasına, onların cəmiyyətin aparıcı qüvvəsinə çevrilməsinə geniş imkanlar yaratmışdır. Güclü, kreativ və vətənpərvər gənclik isə Azərbaycanın dayanıqlı inkişafının və parlaq gələcəyinin əsas təminatçısıdır.

Aybəniz Rüstəmova

Avrasiya universitetinin Humanitar fənlər və regionşünaslıq

kafedrasının müdiri, tarix üzrə fəlsəfə doktoru, dosent