Moskvaya gələn Paşinyanı Putin qəbul etmədi – Kremlidən ikibaşlı açıqama

Xəbər verdiyimiz kimi Ermənistanın baş naziri Nikol Paşinyan ötən gün Rusiyaya səfərə gedib. Məlumata görə, səfərin səbəbi Avrasiya Hökumətlərarası Şurasının iclasında iştirakdır. Erməni baş nazir sosial şəbəkə hesabında təyyarədən çəkilmiş videosuna yazdığı “Moskvaya uçduq” sözləri  birmənalı qarşılanmayıb.

Çünki,  2024-cü ildə Aİİ-yə sədrliyi Ermənistan edir. Amma bununla belə tədbirin İrəvanda yox, Moskvada keçirilməsi xeyli suallar doğurub.

Digər sual doğuran səbəbsə səfər dövründə Rusiya Prezidenti Vladimir Putunun Nikol Paşinyanı qəbul etməməsidir. Doğrudur, Rusiya liderinin mətbuat katibi Dmitri Peskov Vladimir Putinin Ermənistanın baş naziri Nikol Paşinyanı qəbul etməməsi ilə bağlı cavablandırarkən ikibaşlı cavab verib:

“Prezident cənab Paşinyanı onu digər həmkarları ilə birlikdə Sankt-Peterburqda ənənəvi görüş üçün gözləyir. Bu, təbii ki, qeyri-rəsmi görüş olacaq. Lakin, həmin tədbirdə MDB və Avrasiya İttifaqı rəhbərləri bir araya gələcək. Ona görə də bu gün Vladimir Putinlə Nikol Paşinyan arasında ayrıca görüş planlaşdırılmır”.

Məlum olduğu kimi son vaxtlar Rusiya ilə Ermənistan arasındakı münasibətlərdə bir gərginlik var. Paşinyanın Moskva səfərində Putinin diqqətindən kənarda qalmasının da səbəbi bu gərginlikdir.

Qeyd edək ki, bu il Ermənistanın baş naziri Nikol Paşinyanın xahişi ilə Aİİ ölkələrinin - Ali Avrasiya Şurasının rəhbərlərinin görüşü İrəvandan Sankt-Peterburqa köçürülüb. Bu görüş dekabrın 25-də baş tutacaq.

Nəzərə alaq ki, Nikol Paşinyan Aİİ liderlərinin Ermənistan ərazisində görüşünü keçirməkdən imtina etməsini kifayət qədər qalmaqallı şəkildə izah edib. Onun sözlərinə görə, Avrasiya İqtisadi Birliyinin bəzi rəhbərlərini Ermənistanda görmək istəmir. Ona görə də belə bir qərar verib.

Doğrudur erməni baş nazir rəsmi İrəvan üçün arzuolunmaz qonağın konkret kim olduğunu açıqlamayıb. Amma məlumdur ki, Paşinyan daha əvvəllər bəyan etmişdi ki, Aleksandr Lukaşenko orada hakimiyyətdə olduğu müddətdə nə özü, nə də hökumət rəsmilərindən heç biri Belarusa getməyəcək.

Onu da qeyd edək ki, İrəvanla Minsk arasında münasibətlərin kəskinləşməsi Paşinyanın Belarus liderini İkinci Qarabağ müharibəsi zamanı Azərbaycana dəstək verməkdə ittiham etməsindən sonra başlayıb.

News365.az