"Kafe və restoranlarda pulla satılan yeməklər iftar deyil"- Tural İrfan
“Bəzi
adamlar Ramazan ayında cəhənnəmi “satın alırlar”. Çünki iftar pulla verilmir.
Kim iftar süfrəsini, qurban ətini pulla satarsa, o cəhənnəmlikdir. Din alver,
ticarət aləti deyil. Dünyada var-dövlət qazanmaq üçün Allahın dinini ancaq
imansızlar istifadə edə bilər”.
Bunu News365.az-a açıqlamasında dinşünas Tural
İrfan deyib.
O, əlavə
edib ki, imanı, dini, vicdanı olan əsl müsəlman Ramazan ayında imkanı daxilində
müsəlmanlara havayı ehsan edər:
“Buna da
gücü çatmırsa, ən azı qiymətləri endirər. Çox təəssüf ki, bizdə tam əksinədir:
bayramda hər şey bahalaşır. Yenə deyirəm kafe və restoranlarda pulla satılan
yeməklər iftar deyil. Sadəcə dəllalıq edərək adını iftar süfrəsi qoyurlar.
Əlacsız adamlardan başqa kim elə yerlərdə iftar açsa, yəni normadan artıq pul
ödəsə, israf etmiş sayılır ki, bu da dində haramdır. Ona görə müsəlmanlar özlərini
günaha batırmasınlar”.
İlahiyyatçı hesab edir ki, bahalı restoranlarda “iftar süfrəsi”nə getmək və həmin
obyektlərə xeyir vermək özü də günahdır:
“Onların verdiyi yeməklər də şübhəlidir, çox zaman leş və ya bismillahsız kəsilən
ətlər olur. Əti halal olmayan heyvandan hazırlanan yeməklərlə də iftar etmək
olmaz. Kafe, restoran sahibləri savab qazanmaq istəyirlərsə, qardaş Türkiyədəki
kimi, digər müsəlman ölkələrində olduğu kimi oruc tutanlara iftar versinlər.
Oruc tutmasalar belə, heç olmasa, savab qazansınlar. Bunu etmirlərsə, ən azı
camaatı aldadıb, günaha batmasınlar”.
News365.az
