Hollandiya Ukraynanın dəniz qüvvələrini gücləndirir - yeni gəmi artıq təhvil verildi

Hollandiya Ukraynanın dəniz gücünü gücləndirir – “Alkmaar” tipli minaaxtaran gəmi artıq Kiyevin ixtiyarında  Ukraynanın Hərbi Dəniz Qüvvələri donanmasını yeni “Alkmaar” sinifli mina əleyhinə gəmi ilə gücləndirib. Gəmi Hollandiya tərəfindən rəsmi olaraq Ukraynaya təhvil verilib. 

News365.az-ın Unian agentliyinə istinadən xəbərinə görə, bu barədə Ukrayna Hərbi Dəniz Qüvvələrinin komandanı Aleksiy Neyjpapa məlumat verib:  “Biz tərəfdaşlarımızdan ‘Alkmaar’ tipli mina əleyhinə gəmi aldıq. İlin sonuna qədər daha bir belə gəminin Ukraynaya təhvil veriləcəyini gözləyirik. Ekipaj artıq hazırlıq mərhələsindədir.” 

Məlumata əsasən, oktyabrın 13-də Ukrayna Silahlı Qüvvələrinin Ali Baş Komandanı Hollandiyanın müdafiə naziri Ruben Brekelmans və ölkənin Silahlı Qüvvələrinin baş komandanı general Onno Eyxelsheym ilə görüş keçirib. Tərəflər gələcək hərbi əməkdaşlıq istiqamətlərini və dəniz təhlükəsizliyini müzakirə ediblər. 

Xatırladaq ki, ötən ay Hollandiya Müdafiə Nazirliyi Kiyevə hərbi yardım prosesini sürətləndirmək üçün 2026-cı ilə planlaşdırılmış maliyyə vəsaitinin bir hissəsini 2025-ci ilə keçirdiyini açıqlamışdı. Bundan əlavə, Niderland Ukrayna hərbi qulluqçularının hazırlığında da fəal iştirak edir – 2022-ci ildən bəri təxminən 60 min ukraynalı əsgər holland mütəxəssislərin dəstəyi ilə təlim keçib.