Gənc futbolçunun ölümünə səbəb olan sürücü AZADLIĞA ÇIXDI

Xəbər verdiyimiz kimi, Azərbaycan Prezidenti İlham Əliyev məhkum edilmiş bir sıra şəxslərin əfv olunması haqqında Sərəncam imzalayıb.

News365.az-ın xəbərinə görə, əfv olunanlar siyahısında Bəşirov Fəxrəddin Asif oğlu da var. 

O, cəzanın çəkilməmiş hissəsindən azad edilib.

Qeyd edək ki, 2018-ci il oktyabrın 2-də, saat 10 radələrində Sumqayıt şəhər sakini Fəxrəddin Bəşirov idarə etdiyi "İsuzu" markalı 90-XU-233 dövlət qeydiyyat nişanlı yük avtomobili ilə Binəqədi rayonu, Novxanı qəsəbəsi, Dəniz Kənarı küçəsində hərəkətdə olarkən yolu keçmək istəyən 2004-cü il təvəllüdlü Ayxan Qasımov və Rasim Bayramovu vurub. Onlar aldıqları xəsarətlərdən hadisə yerində ölüblər.

Qəza nəticəsində dünyasını dəyişənlərdən biri - Ayxan Qasımov "Sumqayıt"ın U-15 komandasında çıxış edib.

Fəxrəddin Bəşirov Bakı Ağır Cinayətlər Məhkəməsinin qərarı ilə 2019-cu ilin mayında 9 il müddətinə azadlıqdan məhrum edilib.