Dövlət Turizm Agentliyi yay mövsümünü indi açır?
Təzə xəbər:
Dövlət Turizm
Agentliyi tərəfindən Şüvəlan qəsəbəsində yaradılan 3 yeni ictimai çimərlik
ictimaiyyətə təqdim olunub. Layihə çərçivəsində sahilboyu abadlıq işləri
görülüb, müasir infrastruktur – idman və uşaq meydançaları, sanitar qovşaqlar,
duş və soyunma otaqları quraşdırılıb.
Bu çimərliklər
tamamilə ödənişsizdir və vətəndaşların rahat istirahəti üçün nəzərdə tutulub.
Burda deyiblər ey, “avazın yaxşı gəlir,
oxuduğun quran olsa”. Çimərlik açmaq yaxşı işdi, özü də pulsuz olanda lap əla.
Amma bir əmma var ki, görülən hər bir işin
ictimai yükü olmalıdır, həyatı əhəmiyyət kəsb eləməlidir. Bunlar olmayanda
görülən iş olur özfəaliyyət. Yəni iş ictimaiyyət üçün yox, korporativ maraqlar
üçün edilmiş sayılır.
Bax, Dövlət Turizm Ağentliyinin də çimərlik
açma məsələsi də eynən belədir. Çimərlik
mövsümünün başa çatdığı bir vaxtda yeni
çimərlikliklər tikib istifadəyə vermək heç bir ictimai maraq və anlam daşımır.
Əgər Agentlik bunu sadə insanlar üçün edirdisə,
ən azından çimərlik iyunda istifadəyə verilməli idi. Üstəlik 3 çimərliyin
hamısının eyni məkanda açılması da maraq
və şübhə doğurur. Bəyəm olmazdı ki, bu çimərlikdən biri Novxanıya, biri
Türkana salınsın?!
Əlbəttə ki, olardı. Amma olmadı. Çünki Dövlət
Turizm Agentliyinə nümunəvi xidmət və layiqli iş yox, göstəri, hesabat
lazımdır. Bu hesabata görə də külli miqdarda büdcə vəsaiti silinib gedəcək.
Bax, Agentlik məhz büdcə vəsaitinin silinməsi
üçün mövsümün sonunda “hərəkətə keçib”.
