Çingiz Abdullayev: “Mənə dil imtahanında “beş” verməzlər, amma “dörd” alaram" - MÜSAHİBƏ

Xəbər verdiyimiz kimi, Dövlət İmtahan Mərkəzinin sədri Məleykə Abbaszadə Azərbaycan Yazıçılar Birliyinin üzvlərini dil imtahanlarından keçməyə çağırıb.

"DİM olaraq Azərbaycan Yazıçılar Birliyinin üzvlərinə, müəllimlərə, elm adamlarına müraciət etmək istəyirik ki, bu imtahandan keçsinlər", - deyə DİM sədri qeyd edib.

Azərbaycan Yazıçılar Birliyinin birinci katibi, Xalq yazıçısı Çingiz Abdullayev “teleqraf.az”a müsahibəsində sözügedən mövzu ilə bağlı sualları da cavablandırıb.

Müsahibənin həmin hissəsini təqdim edirik:

- Çingiz müəllim, Dövlət İmtahan Mərkəzi İdarə Heyətinin sədri Məleykə Abbaszadənin AYB üzvlərinin Azərbaycan dilindən imtahan verməsi haqda təkliflə çıxış edib. Bu təkliflə bağlı mövqeyinizi bilmək istərdik.

- Bu haqda fikir bildirmək istəmirəm. Mən Məleykə Abbaszadəni çoxdan tanıyıram. Görünür, kimsə Məleykə Abbaszadəyə axmaq bir sual verib, o da hirslənərək belə bir fikir bildirib.

- Məleykə Abbaszadə bu təklifi tədbirdə açıqlayıb. Ümumiyyətlə, Azərbaycan Yazıçılar Birliyinin birinci katibi olaraq, yazıçıların Azərbaycan dilindən imtahan verməsi təklifini necə qarşılayırsınız?

- Mən az öncə dediyim kimi Məleykə Abbaszadəni çoxdan tanıyıram, ona görə də bu məsələ haqda fikir bildirə bilmərəm. Bəlkə Məleykə Abbaszadəyə hansısa sual ünvanlayıblar, o da elə cavab verib. Onu da başa düşün, qadındır, hamı üstünə düşür. Təbii ki, dili yaradan yazıçılardır. Dil bazarda yaranmır. Dil institutlarda da yaranmır. Dili yazıçılar yaradır, mən də rus dilində yazıram. Amma yazıçı Anar Rzayev, Fikrət Qoca, Nəbi Xəzri, Cabir Novruz, İsmayıl Şıxlı, Süleyman Rüstəm, Səməd Vurğun, Rəsul Rza kimi şəxsiyyətlərimiz Azərbaycan dilini yaradıblar.

Yazıçıların imtahan verməsi gülməli görsənir. Yenə deyirəm ki, Məleykə Abbaszadəni başa düşmək lazımdır, indi hamılıqla qadının üstünə düşüblər. Belə etmək lazım deyil. Bəlkə hirslənib o fikri bildirib, amma belə də yox...

- Yazıçıların Azərbaycan dilindən imtahan verməsi haqda təklif təsdiq edilsə, siz imtahanda iştirak edərsinizmi?

- Bəli, lazım olsa, imtahanda iştirak edərəm. Mən rus dilində yazıram. Azərbaycan dilini də çox gözəl bilirəm. Onu da deyim ki, yazıçı Anarın kitabını Azərbaycan dilindən rus dilinə mən tərcümə etmişəm. Halbuki yazıçı Anar rus dilini məndən aşağı səviyyədə bilmir. O məktəbi Azərbaycan dilində bitirsə də, üç ali təhsilini rus dilində alıb. Düzdür, and içdim ki, heç vaxt kitab tərcümə etməyəcəm. Mənə beş kitab yazmaq daha uyğundur, nəinki bir kitabı tərcümə etmək.

Dediyim kimi, lazım olsa, imtahan da verərəm. Düzdü, inanmıram ki, mənə “beş” verəcəklər, amma heç olmasa “dörd” alaram... (Gülür).