Bakıda sığınacaqda virusa yoluxan uşaqların SON DURUMU

Xatırladaq ki, “Azərbaycan Uşaqları” İctimai Birliyinin sığınacağında səkkiz uşağın rotavirusa yoluxması ilə bağlı məlumat verilmişdi. 

Məsələ ilə bağlı “Azərbaycan Uşaqları” İctimai Birliyinin sədri Kəmalə Ağazadə  bildirib ki, virus ürəkbulanma, qusma, yüksək temperaturla başlayır və bəzi uşaqlarda burun qanaması, ishal kimi əlamətlərlə müşahidə olunur. 

“Bu vəziyyət ürəkbulanma, qusma, yüksək qızdırma ilə başlayır, bəzi uşaqlarda burundan qanaxma, ishal halları da olub. Hal hazırda vəziyyətləri orta ağır olduğundan 2 uşaq xəstəxanadadır. Digər 6 uşaq həkimlərin yazdığı təyinatlar  əsasında sığınacaqda müalicə alır. Vəziyyətləri stabilləşməyə doğru gedir”- deyə o, bildirib. 

Xəstəxanaya yerləşdirilən uşaqların səhhəti ilə bağlı TƏBİB-dən isə bildirilib ki, “Azərbaycan Uşaqları” İctimai Birliyinin sığınacağından Respublika Pediatriya Mərkəzinin nəzdində olan Nizami Uşaq Yoluxucu Xəstəlikləri Xəstəxanasına mövsümi xarakter daşıyan yuxarı tənəffüs yollarının kəskin xəstəlikləri səbəbilə 2 uşaq hospitalizasiya olunub.  31.03.2025-ci il tarixində xəstəxanaya yerləşdirilən iki uşağa yuxarı tənəffüs yollarının dəqiqləşdirilməmiş infeksiyası diaqnozu təyin edilib. Hazırda müvafiq şöbədə müalicələri davam etdirilir, vəziyyətləri stabildir”.