Bakıda kirayə qiymətləri artır- Hansı ərazilərdə mənzil tapmaq daha ucuzdur? + AÇIQLAMA

"Kirayə qiymətləri təklif və tələb balansına görə dəyişir".

Əmlak eksperti Elnur Azadov News365.az-a açıqlamasında bildirib ki, kirayə qiymətlərindəki dəyişikliklər əsasən bazarda təklif və tələb balansından asılıdır.

Onun sözlərinə görə, tələb nisbətən az, təklif isə çox olan ərazilərdə qiymətlər daha stabildir, lakin tələb çox və təklif az olduqda qiymətlər yüksəlir.

Azadov qeyd edib ki, Bakı və Abşeron ərazisində kirayə bazarında vəziyyət fərqlidir. Xırdalan, Masazır və digər yaxın ərazilərdə kirayə seçimlərinin daha əlverişli olması, eyni zamanda mənzillərin çoxluğu qiymətlərin stabil qalmasına səbəb olur. Lakin şəhərin mərkəzi və inkişaf etmiş rayonlarında təklif az, tələb isə yüksək olduğundan kirayə qiymətləri artmaqda davam edir.

Ekspert vurğulayıb ki, bəzi ərazilərdə qiymət artımına həm də mənzillərin keyfiyyəti, yerləşdiyi ərazi və infrastruktur faktorları təsir edir. Məsələn, böyük və modern layihələrdə, kommunikasiya və nəqliyyat imkanları yaxşı olan ərazilərdə kirayə qiymətləri daha sürətlə yüksəlir.

Azadov əlavə edib ki, bazardakı artım həm satış, həm də kirayə bazarında hiss olunur və əmlakın yerləşdiyi ərazi, təklif və tələb nisbəti, eləcə də mənzilin ölçüsü və komfort səviyyəsi qiymətlərin formalaşmasında əsas rol oynayır.

Beləliklə, kirayə bazarında qiymətlərin dəyişkənliyi həm bazar qanunları ilə, həm də ərazilərin xüsusiyyətləri ilə sıx bağlıdır və hər bir ərazidə vəziyyət fərqlilik göstərir.