Alimlər insanın ən xoşbəxt olduğu yaşı açıqladı

Çoxlarının düşündüyünün əksinə olaraq, 20 yaş insan həyatının ən yaxşı dövrü deyil. Yeni tədqiqatlara əsasən, insanlar həqiqətən həyatlarından məmnun olmağa və xoşbəxtliyi tapmağa 50 yaşdan sonra başlayırlar.

News365.az Qaynarinfo-a istinadə xəbər verir ki, "Yourtango" nəşrinin təqdim etdiyi və 20-dən çox ölkədən 200 mindən artıq iştirakçının qatıldığı "Qlobal firavanlıq araşdırması"na görə, insanların əksəriyyəti 50 yaşa qədər öz həyatlarını yetərincə dəyərləndirə bilmir və yüksək rifah səviyyəsinə çata bilmirlər.

Tədqiqat göstərib ki, 18–29 yaş aralığında olan gənclər adətən xoşbəxtlik, fiziki və psixi sağlamlıq, öz xarakterlərini qəbul etmə, həyatın mənasını tapma, münasibətlərin keyfiyyəti və maliyyə sabitliyi baxımından çətinliklər yaşayırlar. Bu isə firavanlıqdan uzaq bir mənzərə yaradır.

Z nəsli və dəyişən uğur anlayışı

Z nəsli yeniyetməlik dövründə böyüklərdən "yetkin həyatın necə görünməli olduğu” barədə fikirlər eşitsə də, artıq özləri yetkin olduqda bu meyarlara nail olmağın daha da çətinləşdiyini müşahidə edirlər. Ev sahibi olmaq, yüksək maaşlı iş tapmaq, ailə qurmaq kimi uğur əlamətləri indi çoxlarına əlçatmaz görünür.

Bununla belə, alimlər bildirirlər ki, insanın xoşbəxtliyi onun öz əlindədir və bu istiqamətdə atılan şəxsi addımlar mühüm rol oynayır.

Ən əsas faktor - münasibətlər

Araşdırmada vurğulanır ki, xoşbəxt həyatın əsas açarı insan münasibətləridir. Dini və ya ictimai fəaliyyətlərdə iştirak edən, başqaları ilə birgə yaşayan və ya birlikdə yemək yeyən insanlar daha yüksək rifah səviyyəsi bildiriblər. Hər kəs həyatın bütün aspektlərinə nəzarət edə bilməsə də, öz davranışlarını idarə edə bilər.

Alimlər tövsiyə edir ki, ümidsizliyə qapılmaq əvəzinə, sevdiklərinizlə vaxt keçirməyə üstünlük verin. Bu, həm emosional, həm də sosial rifahı artırmaqda təsirli addımdır.