Alimlər insan gözünün əvvəllər görə bilmədiyi yeni rəng yaradıblar

İnsan gözü milyonlarla rəng çalarını fərqləndirə bilsə də, alimlər adi işıq şəraitində görmək mümkün olmayan yeni rəng əldə ediblər.

News365.az xəbər verir ki, tədqiqatçılar xüsusi lazer sistemi vasitəsilə beş iştirakçının gözündə tor qişanın müəyyən hüceyrələrini dəqiq stimullaşdıraraq “olo” adlandırılan rəngi görməyə nail olublar. 

Bu rəng mavi ilə yaşıl arasında yerləşən, qeyri-adi dərəcədə doymuş çalar kimi təsvir edilir.

Adi işıq gözümüzdəki müxtəlif rəng reseptorlarını eyni anda aktivləşdirir. Lazer texnologiyası isə məhz yaşıl rəngə həssas olan M-konus hüceyrələrini ayrıca stimullaşdırmağa imkan verib.

Təcrübədə iştirakçılar adi rəng palitrasında olmayan çalar görüblər. Bununla belə, “olo” rəngi gündəlik həyatda adi ekran və ya boya vasitəsilə göstərilə bilən rəng deyil.

Bu təcrübə insanın rəng qavrayışının yalnız ətrafımızdakı işıqdan deyil, həm də göz və beynin həmin işığı necə emal etməsindən asılı olduğunu göstərir.