ADY COP29 çərçivəsində iqlim siyasətində aktiv iştirak edib- FOTOLAR

“Azərbaycan Dəmir Yolları” QSC (ADY) BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyası (COP29) çərçivəsində keçirilmiş tədbirlərə fəal şəkildə qoşularaq dayanıqlı nəqliyyat və iqlim siyasətindəki mühüm rolunu bir daha nümayiş etdirib. Müxtəlif müzakirə və dəyirmi masalarda iştirak, keçirilmiş görüşlər və tərəfdaşlarla imzalanmış sazişlər vasitəsilə ADY karbon emissiyasının azaldılması və dayanıqlı nəqliyyat sistemlərinin inkişafı üzrə öhdəliklərini təsdiqləyib.

ADY-dən News365.az-a verilən məlumata görə, COP29 çərçivəsində noyabrın 19-da ADY sədri Rövşən Rüstəmov və İsveçrənin “Stadler Rail Group” şirkətinin icraçı vitse-prezidenti Daniel Baer Təlim və İnkişaf Mərkəzinin yaradılmasına dair müqavilə imzalayıblar. 2027-ci ildə istifadəyə verilməsi nəzərdə tutulan Mərkəz dəmiryol sahəsində ixtisaslı kadrların hazırlanmasında, həmçinin “Stadler” qatarlarını idarə edəcək maşinistlərin təlimində mühüm rol oynayacaq.

ADY-nin fəaliyyəti təkcə yerli səviyyədə deyil, beynəlxalq müstəvidə də diqqət çəkib. 20 noyabrda Dünya Bankının təşkil etdiyi “Dəmiryol əməliyyatlarının sürətləndirilməsi üçün etibarlı həllər” mövzusunda keçirilmiş tədbirdə Azərbaycanın dəmiryol şəbəkəsinin karbon emissiyasının azaldılmasında rolu və infrastrukturun inkişafında dövlət maliyyəsinin əhəmiyyəti vurğulanıb.

Bundan əlavə, 20 noyabr tarixində ADY və Beynəlxalq Dəmir Yolları İttifaqının (UIC) birgə təşkil etdiyi “Nəqliyyat dəhlizləri ilə dayanıqlı gələcəyə doğru: İqlim siyasətində dəmir yolları” adlı tədbir iqlim dəyişikliklərinə qarşı mübarizədə Azərbaycanın əhəmiyyətli rolu və dayanıqlı nəqliyyatın təmin edilməsi, xüsusilə dəmiryol şəbəkəsinin karbon emissiyasının azaldılmasına verdiyi həlledici töhfəyə həsr olunub.

Tədbirdə ADY sədri, Dəmir Yolları Əməkdaşlıq Təşkilatının sədri, Beynəlxalq Dəmir Yolları İttifaqının sədri və Polşa Dəmir Yollarının baş icraçı direktoru, AİB-nin Nəqliyyat Sektoru Qrupunun direktoru, “Masdar” şirkətinin Azərbaycan üzrə direktoru və ADY sədrinin müavini dəmir yollarının ekodost nəqliyyat növü olması, bərpa olunan enerjidən istifadənin artırılması təşəbbüsünün dəstəklənməsi və beynəlxalq maliyyə institutları tərəfindən bu təşəbbüsün maliyyələşdirilməsi kimi məsələlər ətrafında çıxışlar ediblər.

Müzakirələr zamanı ADY-nin son iki ildə əldə etdiyi uğurlar – karbon emissiyasının 9%, enerji istehlakının 5%, təbii qaz istehlakının 16%, su sərfiyyatının isə 23% azaldılması xüsusi vurğulanıb, ADY ilə UIC arasında “Dəmir yollarının iqlim öhdəliyi” sənədi imzalanıb.

ADY nümayəndələri COP29 çərçivəsində keçirilən digər mühüm tədbir və müzakirələrdə də aktiv iştirak ediblər. 20 noyabr tarixində “Qitələri birləşdirən yol: İpək Yolu boyunca davamlı nəqliyyat və logistika – Avropa və Latın Amerikası” mövzusunda müzakirələrdə çıxış edən ADY sədri rəqəmsal həllər sayəsində Orta Dəhlizdə yüklərin dəniz marşrutları ilə müqayisədə üç dəfə daha sürətlə daşındığını diqqətə çatdırıb. Tədbirdə dəmiryol nəqliyyatının karbon emissiyasını sıfıra endirmək məqsədilə beynəlxalq əməkdaşlığın gücləndirilməsinin vacibliyi vurğulanıb.

Eyni zamanda, 20 noyabr tarixində ADY “Dayanıqlı və rəqəmsal Orta Dəhliz və onun hüdudlarından kənarda” mövzusunda keçirilən nazirlərin dəyirmi masasında təmsil olunub. Tədbirdə beynəlxalq nəqliyyat dəhlizləri üzrə yükdaşımalarda sıfır karbon emissiyası hədəfinə çatmaq üçün əməkdaşlığın gücləndirilməsi və əməliyyatların rəqəmsallaşdırılması ilə bağlı məsələlər müzakirə olunub.