ABŞ Kubaya qarşı siyasəti sərtləşdirir – yeni sanksiyalar və bəyanat

ABŞ Dövlət katibi Marco Rubio bildirib ki, Vaşinqton gələcəkdə Kuba ilə bağlı siyasətini daha da fəallaşdıracaq. O, Kuba iqtisadi modelini tənqid edərək ölkəni “yoxsul vəziyyətdə olan dövlət” adlandırıb.

Rubionun sözlərinə görə, Kubada mövcud iqtisadi sistem uğursuzdur və hökumət bu problemi həll etməkdə çətinlik çəkir. O həmçinin qeyd edib ki, ada ölkəsi ABŞ-ın rəqibləri üçün müəyyən platformaya çevrilib və bu vəziyyət Vaşinqton üçün qəbuledilməzdir.

Məsələ ilə bağlı politoloq Turan Rzayev News365.az-a açıqlama verib.

“Bu status-kvo bizi qane etmir. Biz bununla məşğul olacağıq, lakin bu gün deyil”, – deyə ABŞ Dövlət katibi bildirib.

Eyni zamanda, ABŞ administrasiyası keçmiş prezident Donald Trump tərəfindən imzalanmış sərəncam əsasında Kuba iqtisadiyyatının təxminən 40 faizinə nəzarət edən GAESA holdinqinə qarşı yeni sanksiyalar tətbiq edib.

Qərar Kuba tərəfinin sərt reaksiyasına səbəb olub. Kuba Xarici İşlər Nazirliyi ABŞ-ın addımını kəskin tənqid edərək bildirib ki, yeni məhdudiyyətlər ölkəni beynəlxalq maliyyə sistemindən daha da təcrid etməyə yönəlib.

Havana hesab edir ki, sanksiyalar Kuba iqtisadiyyatının əsas sektorlarına – xüsusilə turizm, maliyyə və sənaye sahələrinə ciddi zərbə vurur və bu addımların həm iqtisadi, həm də siyasi məqsəd daşıdığı bildirilir.

Mövcud vəziyyətdə Kuba artıq yanacaq qıtlığı, enerji böhranı və istehsal azalması ilə üzləşir. Yeni sanksiyaların isə bu problemləri daha da dərinləşdirəcəyi ehtimal olunur.

ABŞ-ın bu siyasəti fonunda ekspertlər Vaşinqtonun Çin, Rusiya, İran və digər ölkələrlə paralel gərginlik yaşadığını qeyd edir və bunun qlobal siyasətdə əlavə risklər yaratdığına diqqət çəkirlər.