"ABŞ-ın strateji xətti tədricən Çini zəiflətmək istiqamətində formalaşır"- Politoloqdan şərh

"Danışıqların və mesajın göndərilməsində açıq məlumat mənbələrində konkret bir şeyin olmamasına baxmayaraq, bu, məsələnin müzakirə edilmədiyi anlamına gəlmir. "

Politoloq Əli Mustafa bu sözləri News365.az-a şərh edib. 

"Amma məsələ Rusiya iştirakına gəldikdə, mən düşünürəm ki, bu, mütləq nəzərə alınır. Əgər ABŞ doğrudan da Rusiyanın bu yollar üzərində nəzarətini istəməsəydi, onda “Şimal yolu”nu sıradan çıxarardı. Onsuz da Trampın belə bir imkanı var. Çindən Avropaya gedən və Rusiya ərazisindən keçən yolun qarşısındakı maneələri müəyyən formada aradan qaldırardı. Yəni o yolun önəmini azaldardı və əslində bu istiqamətdə müəyyən addımlar da atılmışdı.

"ABŞ Rusiyanın bu ticarət yolları üzərində nəzarət etməsində və ya bu nəqliyyat marşrutlarında iştirakında maraqlı deyil. ABŞ “Orta Dəhliz”in də bir formada Rusiyanın nəzarətində və ya iştirakı ilə işləməsini istəmir. Amma dediyim kimi, sanki bu məsələni təxirə salırlar. Ola bilər, hələlik İran məsələsinin həll olunması prioritetdir. Demək olar ki, ABŞ, daha dəqiqi Tramp düşünür ki, bu mərhələdə Rusiyanın əleyhinə çıxması halında, Rusiya İran məsələsində müqavimət göstərə bilər və bu da əlavə problemlərə səbəb ola bilər.

Bəlkə də bu riskləri nəzərə alaraq, hələlik ABŞ Cənubi Qafqazı diqqətdən kənarda saxlayır. Həmçinin “Orta Dəhliz” məsələsində də o qədər maraqlı görünmür. Cənubi Qafqaz sanki onun prioritetləri arasında deyilmiş kimi davranırlar. Halbuki Türkiyə çox strateji bir bölgədə yerləşir. Və bu, təkcə bizim bölgəmiz üçün deyil, həm də Türkiyənin özü üçün ciddi əhəmiyyət daşıyır.

Onsuz da biz görürük ki, ABŞ-ın strateji xətti tədricən Çini zəiflətmək istiqamətində formalaşır."