Yayda qadın sağlamlığına nələr təsir edir?

Yay aylarında qadınlar daha çox aktiv olur, dənizə, hovuza gedir, günəş altında vaxt keçirir. Bu həm faydalı, həm də riskli ola bilər. Xüsusilə də hamilə qadınlar üçün bəzi hallar təhlükəli ola bilər.

Mama-ginekoloq Zivər Eldarova bununla bağlı dəyərli məsləhətlərini verib.

Həkim deyib ki, günəş şüalarının faydaları var. Məsələn, bədən D vitamini sintez edir, bu da sümüklərə və immun sisteminə yaxşı təsir edir. Günəş eyni zamanda insanın əhvalını da yaxşılaşdırır. Amma uzun müddət günəş altında qalmaq zərərlidir. Hamilə qadınlarda bədənin çox qızması körpəyə təsir edə bilər. Həmçinin günəş ləkələri və dəri problemləri yarana bilər. Dəri xərçəngi riski də artır.

Dəniz və hovuz da əgər təmiz deyilsə və gigiyenaya əməl olunmazsa, müxtəlif infeksiyalara səbəb ola bilər. Məsələn, göbələk infeksiyası, bakterial vajinit, sidik yolları infeksiyası, hətta cinsi yolla keçən xəstəliklər belə yayda daha çox yayılır.

Dəniz və hovuzdan sonra yaş alt paltarda uzun müddət qalmaq olmaz. Bu, infeksiyaların yaranmasına şərait yaradır. Bəzi bakteriyalar və viruslar hovuz suları ilə yayılır. Hovuz vajiniti, trixomoniaz, HPV, herpes kimi infeksiyalar bu dövrdə daha tez aktivləşə bilər. Hamilə qadınlar daha həssas olduqları üçün daha diqqətli olmalıdırlar.

Ən vacib qoruyucu tədbirlər bunlardır: Günəş altında çox qalmaq olmaz. Xüsusilə saat 11:00-dan 16:00-a kimi. Günəş kremlərindən istifadə etmək vacibdir. Dəniz və hovuzdan çıxandan sonra dərhal duş qəbul etmək və alt paltarı dəyişmək lazımdır. Başqasının dəsmalından istifadə etmək olmaz. Pambıq və rahat alt geyimlər geyinmək daha sağlamdır.

Əgər vaginal axıntı, qaşınma, pis qoxu və ya narahatlıq varsa, mütləq həkimə müraciət etmək lazımdır. Özbaşına dərman istifadə etmək düzgün deyil. Həm qadının, həm də partnyorun eyni vaxtda müalicə alması vacibdir.

Yay istirahət üçün gözəl mövsümdür. Amma sağlamlığımızı da qorumalıyıq. Düzgün gigiyena və vaxtında tədbir görmək bizi bir çox problemlərdən qoruyar.