Ukrayna Rusiyanı arxadan vurur: Krımda YANACAQ BÖHRANI
Ukrayna ordusu son günlər Krım yarımadası, Kerç boğazı və Rusiyanın daxili yanacaq-logistika infrastrukturuna qarşı zərbələrini maksimum dərəcədə intensivləşdirib. Əsas hədəflər sırasında Kerç ətrafındakı yanacaq terminalları, limanlar və neft obyektləri yer alır. Bu hücumlar sadəcə hərbi əməliyyat deyil, Moskvaya qarşı strateji təzyiq dalğası kimi qiymətləndirilir.
Mövzu ilə bağlı News365.az-a açıqlama verən politoloq Züriyə Qarayeva cəbhənin arxasındakı gizli savaşı və tərəflərin yeni gedişlərini şərh edib.
"Kiyev anlayır ki, yalnız ön xətdə irəliləmək kifayət deyil"
Politoloq qeyd edib ki, Ukraynanın məhz Kerç boğazı istiqamətində fəallaşması planlaşdırılmış bir strateji gedişdir:
"Kerç boğazı Rusiyanın Krımla ən həyati bağlantı xəttidir. Moskva yarımadanı həm nəhəng bir hərbi baza, həm də cənub cəbhəsinin əsas təchizat məntəqəsi kimi istifadə edir. Kiyev yaxşı anlayır ki, Rusiyanın Krımdakı mövqelərini zəiflətmək üçün təkcə cəbhədə irəliləmək yetərli deyil. Əsas məqsəd Rusiyanın bu əraziləri saxlamaq xərclərini artırmaq və logistikasını iflic etməkdir".
Ekspertin sözlərinə görə, Krım körpüsü Moskva üçün həm də siyasi-simvolik məna daşıyır. Ukraynanın bu xətti davamlı hədəfə alması həm hərbi, həm də ciddi psixoloji təsir yaradır. Əgər bu marşrutda fasilələr mütəmadi hal alarsa, Rusiyanın yarımadadakı hərbi mövcudluğu böyük risk altına düşəcək.
Yanacaq savaşı: Müharibənin tempini nə dəyişir?
Züriyə Qarayeva vurğulayıb ki, müharibə meydanında yanacaq təminatı bəzən silahlardan daha həlledici rol oynayır:
Hərbi tempin aşağı salınması: Tankların, artilleriyanın və hava hücumundan müdafiə (HHM) sistemlərinin işləməsi birbaşa yanacaqdan asılıdır. Ukrayna məhz bu zənciri qırmaqla Rusiyanın hücum ritmini pozur.
HHM sistemlərinin parçalanması: Arxa cəbhədəki infrastrukturun vurulması Rusiyanı unikal vəziyyətlə üz-üzə qoyur. Moskva öz neft bazalarını qorumaq üçün cəbhə xəttindəki güclü HHM resurslarını uzaq daxili bölgələrə çəkməyə məcbur olur.
Müharibənin xarakteri dəyişir: "Aşındırma savaşı"
Züriyə Qarayevanın fikrincə, bu hücumlar Rusiyanı daha sərt addımlara və Ukraynanın enerji sisteminə cavab zərbələri endirməyə sövq edəcək. Lakin bu reaksiyalar artıq prosesi geri döndərə bilmir:
"Burada ən mühüm məqam odur ki, Ukrayna artıq tam müdafiə mövqeyindən çıxıb. Rusiya cavab zərbələrini nə qədər artırsa da, bu, Kiyevin infrastruktur və enerji obyektlərini hədəf alma strategiyasını dayandırmır. Baş verənlər müharibənin xarakterində köklü dəyişiklik yarandığını – prosesin resurslar üzərində aparılan uzunmüddətli aşındırma savaşına çevrildiyini göstərir".
