Tim Cook “Apple” rəhbərliyini tərk edir – Şirkətin dəyəri onun dövründə 2 000 faizdən çox artıb

Apple şirkətinin baş direktoru Tim Cook 15 illik rəhbərlik fəaliyyətindən sonra vəzifəsini tərk etməyə hazırlaşır.

News365.az xəbər verir ki, Cook 2011-ci ilin avqustunda, şirkətin əfsanəvi rəhbəri Stiv Cobsun ölümündən qısa müddət əvvəl “Apple”ın baş direktoru olmuşdu. Həmin vaxt onun üzərinə dünyanın ən böyük innovatorlarından biri hesab edilən Cobsun yaratdığı irsi davam etdirmək kimi çətin vəzifə düşmüşdü.

Lakin Cook zamanla Cobsu təqlid etmək əvəzinə şirkəti öz strategiyası ilə inkişaf etdirdi. Onun rəhbərliyi dövründə “iPhone” təkcə telefon deyil, insanların gündəlik həyatının çoxsaylı sahələrində istifadə etdiyi əsas texnoloji platformaya çevrildi.

Bu dövrdə “Apple” ekosistemi mobil ödənişlərdən musiqiyə, idmandan kredit kartı ödənişlərinə qədər genişləndi. Şirkətin müxtəlif onlayn xidmətləri və aksesuarları da bu strategiyanın mühüm hissəsinə çevrildi.

Cookun rəhbərliyi dövründə “Apple”ın səhmləri 2 000 faizdən çox bahalaşıb. Şirkət 2026-cı ilin iyulunda qısa müddət ərzində 5 trilyon dollarlıq bazar kapitallaşmasına çataraq tarixdə bu həddi keçən ikinci şirkət olub.

İndi isə “Apple” üçün yeni mərhələ başlayır. Cookun yerinə şirkətin aparat mühəndisliyi üzrə rəhbəri Con Ternus keçəcək.

Ternusun qarşısında Cobs kimi innovativ bir simanı deyil, 15 il ərzində şirkəti misilsiz maliyyə göstəricilərinə çatdırmış Cookun mirasını davam etdirmək vəzifəsi dayanır.

Ekspertlər hesab edirlər ki, yeni rəhbərliyin əsas sınağı “Apple”ın növbəti böyük texnoloji sıçrayışı həyata keçirib-keçirə bilməyəcəyi olacaq. Şirkətin süni intellekt, yeni nəsil cihazlar və xidmətlər sahəsində atacağı addımlar Ternus dövrünün əsas istiqamətlərini müəyyənləşdirə bilər.