"STAR NEZ Türkiyədə uğurlarını sıralamaqda davam edir" - Elçin İbadov

 “2024-cü ilin sonundan etibarən xamneftin emal həcmi ildə 13 milyon tona çatdırılıb. Beləliklə 2023-cü ildə istehsal gücündən istifadə əmsalı 117,1% təşkil edib”.

News365.az-ın Türkiyəyə ezam olunmuş əməkdaşı xəbər verir ki, bunu “SOCAR Türkiyə”nin baş icraçı direktoru  Elçin İbadov jurnalistlərə açıqlamasında deyib. O bildirib ki,  STAR Neft Emalı Zavodu (NEZ) 19 oktyabr 2018-ci il tarixində beynəlxalq mərasimlə fəaliyyətə başlayıb:

“STAR NEZ, emal və neft-kimya inteqrasiyasını təmin edir və Türkiyədə tək nöqtəyə edilən ən böyük real sektor investisiyasıdır. STAR NEZ, Türkiyənin ilk “Strateji İnvestisiya Təşviqi” Sertifikatına sahibdir. Müəssisədə dizel, nafta, aviasiya yanacağı və LPG kimi müxtəlif neft məhsulları istehsal edilir. 2023-cü ildə Türkiyənin emal olunmuş neft məhsullarına olan ehtiyacının təxminən 18%-ni  bu müəssisə qarşılayıb. STAR NEZ-in istehsal etdiyi illik nafta ilə Petkimin xammal ehtiyacı demək olar ki, tam olaraq ödənilir. Şirkət 2021-ci ildə Dünya İqtisadi Forumunun (WEF) “Global Lighthouse Network” platformasına qoşulan ilk neft emalı zavodu olub.  STAR NEZ Egey Zonası Sənaye Palatasının (EBSO) 2023-cü il üzrə 100 Ən Böyük Şirkət siyahısında birinci yerdə qərarlaşıb.  İstanbul Sənaye Palatası tərəfindən hazırlanan “Türkiyənin 500 Ən Böyük Sənaye Müəssisəsi” 2023 Araşdırması'nda STAR NEZ üçüncü yeri tutub. “Capital” jurnalının hər il Türkiyənin ən böyük şirkətlərini açıqladığı “Capital 500” siyahısında STAR NEZ 2023-cü ildə 11-ci yerdə qərarlaşmışdı. Şirkət Türkiyənin ən yaxşı 500 şirkətinin sıralandığı prestijli “FORTUNE 500 Türkiyə 2023 Araşdırması”nda 11-ci yeri tutub”.

News365.az