SON DƏQİQƏ: Moskva Paşinyana 1 AY VAXT VERDİ

Moskva Ermənistanın baş naziri Nikol Paşinyana ölkənin xarici siyasət kursunu müəyyənləşdirmək üçün təxminən bir ay vaxt verib.

Paşinyan seçim etməlidir: Avropa İttifaqı, yoxsa Avrasiya İqtisadi İttifaqı (Aİİ).

News365.az xəbər verir ki, bu barədə Ermənistanın “Hraparak” qəzeti hökumətdəki mənbələrinə istinadən məlumat yayıb.

Nəşrin məlumatına görə, qərar qəbul edilmədiyi təqdirdə Rusiya məhdudiyyətlərin “ikinci, daha sərt mərhələsinə” keçə bilər. Mənbələr konkret olaraq hansı tədbirlərin görülə biləcəyini açıqlamayıb, lakin bir neçə mümkün ssenaridən danışıblar.

Belə ki, söhbət Rusiyada çalışan erməni əmək miqrantlarına qarşı miqrasiya siyasətinin sərtləşdirilməsindən gedə bilər. Nəşrin həmsöhbətləri xəbərdarlıq edirlər ki, Ermənistan vətəndaşlarının Rusiyadan kütləvi şəkildə geri qayıtması ölkə üçün ciddi iqtisadi və sosial problemlər yarada bilər.

Ermənistan üçün daha bir təhlükə: aviareyslər dayandırıla bilər

Digər mümkün addım kimi Ermənistanla hava əlaqələrinin azaldılması və ya tamamilə dayandırılması göstərilir.

Nəşrin versiyasına görə, bu qərar turizm sektoruna ciddi zərbə vura, aviabiletlərin qiymətinin bahalaşmasına və əlavə logistika çətinliklərinin yaranmasına səbəb ola bilər.

Bundan başqa, mənbələr enerji sahəsində də mümkün təzyiqi istisna etmirlər. Buraya Rusiyadan Ermənistana təbii qaz tədarükü ilə bağlı məsələlər də daxil ola bilər.

Beləliklə, Moskvanın Paşinyan hökumətinə qarşı təzyiq vasitələri sırasında miqrasiya, hava nəqliyyatı və enerji sektorundakı mümkün məhdudiyyətlərin yer ala biləcəyi bildirilir.