Səhiyyə sahəsində HƏYƏCAN TƏBİLİ – Peşəkar əczaçı ÇATIŞMIR

Ölkədə ciddi əczaçı çatışmazlığı var.

Hazırda Azərbaycanda mövcud olan 3 min 300-ə yaxın aptekin təxminən 1 650-nə əczaçı tələb olunur. Kadr çatışmazlığı onunla izah olunur ki, gənclərin bu peşəyə marağı çox aşağı səviyyədədir. Üstəlik, ali məktəblərdə əczaçılıq ixtisası üzrə plan yerlərinin sayı həddindən artıq azdır. 

Nəzərə alaq ki, bir zamanlar Tibb Universitetində əczaçılıq fakültəsini rus bölməsi ilə birgə hər il 150 nəfər bitirirdi. İndi isə bu say cəmi 40-50 nəfərdir. 

Peşəkar kadr çatışmazlığı üzündə apteklərin bir çoxu hətta 6 aylıq kurs keçən gəncləri işə götürürlər. Bu isə qanun pozuntusudur.   

Ona görə də aptekdə çalışan və dərman vasitələrinin buraxılışını həyata keçirən şəxs və ya şəxslər ali və ya orta əczaçılıq təhsilinə malik olmadığı halda İnzibati Xətalar Məcəlləsinin 452.3-cü maddəsinə əsasən vəzifəli şəxslər 500 manatdan 700 manatadək, hüquqi şəxslər 1000 manatdan 2000 min manatadək məbləğdə cərimə olunur.   

Əczaçı çatışmazlığı isə keyfiyyətli xidmətə ciddi əngəl yaradır. 

Məsələ ilə bağlı Bizim.Media-ya danışan Milli Məclisin Səhiyyə Komitəsinin sədr müavini Rəşad Mahmudov deyir ki, hazırda müşahidə olunan əczaçı çatışmazlığı təəssüf ki, vətəndaşlarımızın dərmanlara rahat çıxış imkanlarını müəyyən qədər çətinləşdirir: 

“Bu vəziyyət ən çox pasiyentlərimizin rahatlığına və sağlamlıq xidmətlərinin effektivliyinə mənfi təsir göstərir.

Əczaçıların səhiyyə sistemində oynadığı əhəmiyyətli rol nəzərə alınarsa, mövcud vəziyyətin yaxşılaşdırılması üçün müvafiq qurumlar tərəfindən əlavə təşviqedici addımların atılması və bu sahədə kadr hazırlığının gücləndirilməsi məqsədəuyğun olardı.

Belə tədbirlər nəticəsində həm əhali, həm də səhiyyə işçiləri üçün daha əlverişli şərait yaradılacağına inanırıq”.