"Almaniya Prezidenti Ştaynmayer Bakıda yeni bir şey demədi"- Rasim Musabəyov

"Almaniya Prezidenti Ştaynmayer Bakıda yeni bir şey demədi. Onun sözlərinə görə, Almaniya hər zaman dövlət kimi Azərbaycanın ərazi bütövlüyünü dəstəkləyib və Qarabağı Azərbaycanın ayrılmaz hissəsi kimi tanıyıb. Bununla bağlı təxminən 15 il əvvəl Almaniya Bundestaqında müzakirələr aparılmışdı. Həmin müzakirələrdə belə bir bəyanat qəbul olunmuşdu ki, bu prinsip orada öz təsdiqini tapmışdı."

Bu sözləri Millət Vəkili Rasim Musabəyov News365.az-a açıqlamasında deyib. 

"Həmin dövrdə  Ştaynmayer xarici işlər naziri idi. O vaxt Mərkəzin rəhbərliyi altında fəaliyyət göstərən koalisiya hökumətində – xristian demokratlar və sosialistlər parlamentdə çoxluq təşkil edirdi – belə bir qərar qəbul edilmişdi. Sadəcə olaraq, orada bəzi tərəflər müxtəlif mövqelər sərgiləmişdi. Qarabağ Azərbaycanın ayrılmaz hissəsi kimi tanınıb və əvvəllər də tanınırdı.

Ancaq indiyə qədər nə fransızlar, nə də Avropa İttifaqı Qarabağı ermənilərdən alıb Azərbaycana qaytarmaqdan və orada yüksək səviyyədə muxtariyyət yaratmaqdan danışırlar. Hələ də onların bu cür xülyaları var. Vaxtilə Qarabağ erməniləri muxtariyyətdən istifadə edərək Azərbaycan dövlətini parçalamaq istədilər. Azərbaycan xalqına böyük zülm edildi, insanlar öldürüldü, qırğınlar törədildi.

İndi onlara yenidən muxtariyyət və ya hər hansı bir imtiyaz vermək mümkün deyil. Bunun üçün bir şans var idi – müharibədən əvvəl ağıllı qərar verib Azərbaycanın təkliflərini qəbul etməli idilər. İşğal olunmuş ərazilərdən çıxmaq və muxtariyyəti Azərbaycanın tərkibində – Naxçıvana bənzər şəkildə əldə etmək imkanları var idi. Lakin onlar bu şanslarını itirdilər.

Fərdi qaydada kim geri qayıtmaq istəyirsə, Azərbaycan vətəndaşlığını qəbul etməlidir. Bu halda buyurub müraciət edə bilərlər. Lakin nə muxtariyyət, nə də hər hansı başqa bir status veriləcək. Kimsə bununla bağlı hansısa məsələni qaldırmağa çalışsa belə, buna imkan verilməyəcək.

Separatçıların bayrağı onların saytında yerləşdirilmişdi və bununla Azərbaycana mesaj göndərmək istəyirdilər. Biz onları məcbur etdik ki, həmin bayrağı silsinlər və buna görə rəsmi şəkildə üzr istəsinlər.

Hər bir halda, düşünürəm ki, Almaniya Azərbaycana və regiona hörmətlə yanaşacaq."