Tovuzda itkin düşən qızla bağlı - YENİ DETALLAR - FOTO

13 yaşlı məktəbli Tovuzda itkin düşüb. Valideyni məktəbdə olarkən oradan çıxan qız evə getməyib. İndi hər kəs onu axtarır. Ailənin dediyinə görə, Aysun dəftərlərdə ərəb hərfləri ilə cızma-qaralar edib, sanki o, idarə olunurmuş kimi...

News365.az xəbər verir ki, hadisə rayonun Bozalqanlı kəndində qeydə alınıb. Kənd sakini, 13 yaşlı Aysun Süleymanova ötən gün saat 18:00 radələrində oxuduğu Bozalqanlı kənd tam orta məktəbindən çıxaraq itkin düşüb.

İTKİN QIZLA AİLƏNİN SON GÖRÜŞÜ

Tovuz rayonunun Bozalqanlı kəndindən olan və itkin düşən 13 yaşlı qızın ailəsi bildirir ki, müəllimi Aysunun valideynlərini məktəbə çağıraraq son vaxtlar onun dərsdə özünü qəribə aparması ilə bağlı məlumat verib. Həmin vaxt Aysun sinif yoldaşları ilə dərsdən çıxırmış. Babası Zirəddin Süleymanovun sözlərinə görə, ona "maşına otur, evə birgə gedək" desə də, Aysun sinif yoldaşları ilə gedəcəyini deyib.

"Valideyn kimi məktəbə getdik. Mən maşında çöldə gözlədim. Yoldaşımla gəlinim içəri keçib müəllimlə söhbət etdilər. Həmin vaxt Aysun dərsdən çıxıb. Evə tərəf gedərkən ona dedim: 'Aysun, gəl otur maşına, nənən də çıxsın, birlikdə gedək'. Cavab verdi ki, 'onlar, hələ gec çıxar, mən özüm gedirəm'".

Ailə üzvləri evə qayıdanda isə Aysunun hələ də evə dönmədiyini görüblər. Babası deyir ki, qızın yoxa çıxması çox qısa müddətdə baş verib. Cəmi 10 dəqiqə sonra evə dönən baba Aysunun evdə olmadığını görüb.

"10 dəqiqə çəkdi, gəldik, gördük ki, yoxdu. Başladıq axtarışa. 3-4 saat axtardıq, sonra polisə məlumat verdik".

BABASI AZYAŞLINI NİYƏ İZLƏYİB?

Aysunun babası Zirəddin Süleymanov deyir ki, qızın maşına minməməsindən şübhələnib və bir müddət onu avtomobilin güzgüsündən izləyib. Görüb ki, məktəbin çıxışında bir qıza yaxınlaşır.

"Məndən aralanandan sonra gördüm ki, bir qıza yaxınlaşdı. Güzgüdə baxdım. İndi o sinif yoldaşından soruşuram, deyirəm, 'nə dedi sənə?'. O da cavab verdi ki, 'mənə dedi, sizin evdə əynimi dəyişimmi?'. Dedim, 'olmaz, evimizdə qonaq var'".

Babanın sözlərinə görə, Aysun sinif yoldaşından kömək istədiyini görüb, sonra digər sinif yoldaşına müraciət edib. Bundan isə ailənin Aysun itəndən sonra xəbəri olub.

"Sonra gedib başqa bir sinif yoldaşının evinə. Sumkasını qoyub. Sumkada isə heç nə olmayıb – sadəcə qələm, karandaş və başqa məktəb ləvazimatları. Oradan da çıxıb, deyib ki, 'mən qaçıram'. Hara qaçıb, bilinmir".

O UZAQ GEDƏ BİLMƏZ... YAXINLIQDA OLMALIDIR

Hadisə ilə bağlı ailə üzvləri ilə söhbət zamanı bəzi müəmmalı məqamlar da ortaya çıxır. Aysunun babası iddia edir ki, o, uzağa gedə bilməz.

"Qız uzaq yerə gedəsi deyil. Yəqin ki, kimsə arxasında dayanıb, ona kömək edir. Təxmin edirik ki, təkbaşına uzağa gedə bilməz. Hava da soyuq idi, çöldə qala bilməzdi. Qız uşağıdır, özü də balacadır. Yekə adam deyil ki, qorxmasın".

Hadisənin 10 dəqiqə ərzində baş verdiyini nəzərə alsaq və Aysunun tək-tənha uzağa getməyinin mümkün olmadığını düşünsək, onun yaxınlıqda gizlədildiyi ehtimalını da nəzərdən qaçırmaq olmaz.

"13 yaşlı uşaq hara gedə bilər? 10 dəqiqə idi ki, biz məktəbdən evə gəldik. Nə oldusa, o 10 dəqiqə ərzində oldu. O zaman belə çıxır ki, ya evə gələndə hansısa maşına minib, kənddən uzaqlaşıb, ya da..."

MÜƏLLİM AYSUNUN VALİDEYNLƏRİNİ MƏKTƏBƏ NİYƏ ÇAĞIRIB?

Daha bir maraqlı məqam isə Aysunun ailəsinin məktəbə çağırılmasının səbəbidir. Aysunun babası Zirəddin Süleymanov deyir ki, nəvəsi son günlər məktəbdə və evdə qəribə davranışlar sərgiləyirdi. O, ərəb hərflərindən ibarət yazılar yazırmış.

"Əlyazmalar, şəkillər çəkirdi. İki iynəni bir yerə taxırdı. Onun əşyalarına baxanda içindən şpris ucları, şprislər çıxdı. Bilmirəm, kim beyninə nə salmışdı. Məktəbdə də bu yazılar olub deyə, müəllim ailə üzvlərini məktəbə çağırmışdı".

Aysunun dərs göstəricilərində də geriləmələr müşahidə olunurdu. 13 yaşlı qızın nənəsi Məhluqə Əliyeva da nəvəsinin son vaxtlar davranışında dəyişikliklər olduğunu deyir:

"Məktəbdən çıxdı, elə bildik evə gəlir. Gəldik ki, evdə yoxdur. Axır vaxtlar psixologiyası pozulmuşdu. Psixoloqa aparmışdıq, amma görünür, düzəlmədi. Əksinə, vəziyyəti daha da pisləşdi".

15 GÜNLÜK TƏTİL...

Aysunun qəribə davranışlarına baxmayaraq, ailəsi onun tətil vaxtı özünü yaxşı apardığını bildirir. Babasının sözlərinə görə, Aysun o 15 gün ərzində heç yerə getməyib və daim ailəsinin yanında olub.

"15 gün tətil oldu. O müddətdə Aysun evdə idi, balaca nəvələrimlə oynayırdı. Yemək bişirirdi, çox şən görünürdü. Amma məktəbə getdikdən sonra dəyişdi. Nə baş verdiyini bilmirik. Görünür, məktəbdə kiminləsə ünsiyyət qurub və problem də buradan başlayıb".

Aysunun itkin düşməsi ilə bağlı müxtəlif ehtimallar var, lakin konkret sübut yoxdur. Ortada olan yeganə fakt isə odur ki, o, məktəbdən evə dönərkən yoxa çıxıb.

Gizli qalan mətləblər

Burada hələ də qaranlıq məqamlar var. Doğrudanmı Aysunun ailəsinin məktəbə çağırılması sadəcə bir cızma-qaraya görə idi? Bu suala cavabı onun babası Zirəddin Süleymanov belə verir:

"Bəli, sözügedən məsələ ilə bağlı söhbət gedirdi. Amma burada təkcə cızma-qara məsələsi yox, Aysunun son günlər psixoloji vəziyyətinin pozulması da var idi. O, niyə belə davranırdı, nə biz, nə də məktəb bilirdi."

Məktəbə çağırılan valideynlər və günahlandırılan azyaşlı... Bu məqamda belə bir ehtimal ortaya çıxır: Bəlkə Aysun qorxub? Qızın ailəsi də bu ehtimalı istisna etmir. Babası bildirir ki, bu, mümkündür:

"Bəlkə də qorxub ki, gələndə danlayarıq. Onu həmişə çox istəmişəm, bütün nəvələrimi çox istəyirəm, amma Aysun mənim üçün daha doğmadır. O niyə belə etdi, bilmirəm."

"Uşaq travmalı idi"

Aysunun sarsıntı keçirməsinin və itaətsizlik göstərməsinin səbəblərindən biri də valideynlərinin ayrılığı olub. Boşanmadan sonra o, ata babasının evində yaşayıb. Azyaşlının anasının valideynlərinin evinə getdiyini düşünən ailə bu ehtimalın səhv olduğunu sonradan anlayıb. Onun ana babası İmanverdi Məmmədov deyir ki, Aysun son vaxtlar onlarla əlaqə saxlamayıb:

"Üç ayda bir dəfə bizə gəlib. İldə iki dəfə gəlirdi. Axı o, hələ uşaqdır, 7-ci sinifdə oxuyur, belə bir şey edə biləcək yaşda deyil."

Məktəbin rəhbərliyi isə onun davranışlarında problemlər olduğunu və məktəb psixoloqunun onunla mütəmadi işlədiyini bildirir:

"İtkin düşən qız 7A sinfinin şagirdidir. Dünən sonuncu dərs saatından sonra məktəbi tərk edib. Davamiyyəti ümumiyyətlə yaxşı idi, amma oxumağı zəif idi. Sözə qulaq asmır, müəllimlərə cavab qaytarırdı, çılğın idi. Məktəb psixoloqu onunla məşğul olurdu. Bir sözlə, travmalı bir uşaq idi."

Məktəb nümayəndəsinin sözlərinə görə, valideynləri boşandıqdan sonra qızın davranışlarında dəyişikliklər hiss olunub:

"Ana-ata ayrıldıqdan sonra o, ata babası, nənəsi və əmisi ilə yaşayırdı. Travmalı olsa da, özünü sevən bir qızdır. İnşallah, sağ-salamat tapılar."

Aysunun son göründüyü kənd

Ailənin bildirdiyinə görə, hazırda polis əməkdaşları və kənd sakinləri Aysunu axtarır:

"Hara getdiyini bilən yoxdur. Nə rəfiqələri, nə sinif yoldaşları haraya üz tutduğunu deyə bilmir. Bütün qohumlar, tanışlar, polis axtarışdadır. Kameralara baxırıq, saat 21:00 radələrində Əlimərdanlı yolunda görünüb. Ümid edirik ki, izinə düşüb tapa biləcəyik."

Bozalqanlı kəndi Tovuz şəhərinə bitişikdir və Əlimərdanlı kəndindən təxminən 15-20 kilometr aralıda yerləşir. Aysunun bu məsafəni piyada qət etməsi çətin görünür. Bəs niyə rayona deyil, məhz Əlimərdanlı kəndinə gedib? Bu sual hələ də cavabsız qalır. Üstəlik, Tovuzun onlarla kəndi varkən, niyə məhz Kürətrafı kəndi seçib? Bu məqam da araşdırılmalı faktlardan biridir.

Ehtimal olunan hər yer axtarılıb

Aysunun nənəsi Məhluqa Əliyeva bildirir ki, uşağın hara gedə biləcəyi barədə artıq heç bir ehtimalları qalmayıb:

"Harada ola biləcəyini bilmirik. Heç bir məlumatımız yoxdur. Bir az əsəbi uşaq idi, onu psixoloqa da aparmışdıq. Sonuncu dəfə Qəbələyə ekskursiyaya getmək üçün icazə istədi. Bundan əvvəl iki dəfə icazə vermişdik. Amma bu dəfə yol uzaq olduğu üçün razılaşmadıq. Ola bilər ki, bu səbəbdən inciyib evdən çıxıb."

Bütün bunlar yalnız ehtimallardır. Dəqiq faktlar Aysun tapıldıqdan və araşdırmalar tamamlandıqdan sonra məlum olacaq.

DİN-in Gəncə Regional Qrupunun baş inspektoru Eşqin Qasımov bildirib ki, hazırda polis əməkdaşları tərəfindən axtarışlar davam etdirilir:

"Şəxsin yerinin müəyyən olunması və ailəsinə təhvil verilməsi istiqamətində Tovuz Rayon Polis Şöbəsi tərəfindən müvafiq tədbirlər görülür. Axtarış işlərinin nəticələri barədə ictimaiyyətə məlumat veriləcək."

Polislər, ailə üzvləri və kənd sakinləri yeniyetmənin sinif yoldaşları, qonşular və uzaq qohumlarının evlərini yoxlayıblar.

Qeyd edək ki, Tovuzda itkin düşən 13 yaşlı Aysun Bozalqanlı kənd sakini və məktəblidir. O, kənd tam orta məktəbindən evə getmək üçün çıxıb, lakin ünvana çatmayıb. Axtarışlar davam edir.