Professor açıqladı: 3, 7 və 40 mərasimlərinin İslamda dini əsası varmı?
Azərbaycanda vəfat edən şəxsin yaxınları tərəfindən keçirilən 3, 7 və 40 mərasimləri uzun illərdir cəmiyyətin adət-ənənələri sırasında yer alır. Bu mərasimlərin dini baxımdan əsasının olub-olmaması isə zaman-zaman müzakirə mövzusuna çevrilir.
Professor Rafiq Əliyev dünyasını dəyişən şəxslərlə bağlı keçirilən 3, 7 və 40 mərasimlərinin İslam dinindəki yeri barədə fikirlərini açıqlayıb.
News365.az xəbər verir ki, professor bu mərasimlərin İslamda dəqiq şəkildə müəyyənləşdirilmədiyini bildirib.
Rafiq Əliyevin sözlərinə görə, 3, 7 və 40 mərasimlərinin dini hökm kimi təqdim olunması doğru deyil. O hesab edir ki, bu mərasimlər daha çox zamanla adət-ənənəyə çevrilib.
Professor bu adətlərin formalaşmasında sovet dövrünün də müəyyən təsirinin olduğunu düşünür. Onun sözlərinə görə, həmin dövrdə insanların bir araya gəlməsi və yas mərasimlərində kollektiv şəkildə iştirak etməsi üçün müxtəlif ənənələr formalaşıb.
Rafiq Əliyev qeyd edib ki, bəzi dini ənənələrdə ölünün ardınca keçirilən mərasimlər və yas məclisləri müxtəlif formalarda mövcud olsa da, 3, 7 və 40 günün məhz xüsusi dini mərasim kimi keçirilməsi Quranda dəqiq şəkildə göstərilmir.
Professor xarici ölkələrdəki müşahidələrini də bölüşüb. O bildirib ki, İraq, Suriya, Yəmən və Əlcəzairdə işlədiyi dövrdə belə mərasimlərlə qarşılaşmayıb.
"Həmin cəmiyyətlərdə insan vəfat etdikdə yaxınları bir araya gələrək mərhumun ailəsinə mənəvi dəstək göstərir, birlikdə çay və ya qəhvə içərək yas sahibinin ağrısını bölüşürlər. Əsas məqsəd də məhz insanların kədərini bölüşmək olmalıdır. Yaxşı əməlləri biz bölüşəndə onlar çoxalır. Pis əməlləri, yəni belə kədərli vaxtları biz bölüşsək, onlar azalır. İnsanların kədərini bölüşdürmək lazımdır”.
Professor bildirib ki, cəmiyyətdə 3, 7 və 40 mərasimləri artıq dini qaydadan daha çox adət formasında qəbul olunub.
O, mərhumun ruhunun üç, yeddi və ya qırx gün ərzində müəyyən mərhələlərdən keçməsi ilə bağlı inancların da Quranda dəqiq şəkildə təsbit edilmədiyini vurğulayıb.
Rafiq Əliyevin sözlərinə görə, bu məsələlər zamanla dini təsəvvürlərlə xalq adətlərinin qarışması nəticəsində cəmiyyətdə geniş yayılıb.
Professor sonda yas mərasimlərinin əsas mahiyyətinin mərhumun yaxınlarına mənəvi dəstək göstərmək və insanların onların kədərini paylaşması olduğunu diqqətə çatdırıb.
