Ermənistan-ABŞ müttəfiqliyi Cənubi Qafqaza təhdiddir- TƏHLİL
Xəbər verdiyimiz kimi ötən gün Ermənistan və ABŞ nümayəndələri birgə tərəfdaşlıq
komissiyasının yaradılması haqqında sənəd imzalayıblar. İmzalanma mərasimi Vaşinqtonda
baş tutub.
Razılaşmaya əsasən Amerika sərhəd
patrul qrupu Ermənistanda yerləşdiriləcək. ABŞ-ın dövlət katibi Entoni Blinken yaxın
zamanda Ermənistana ABŞ sərhəd patrul komandası göndəriləcəyini bildirib.
Ermənistan-ABŞ müqaviləsinin Cənubi Qafqaza təsiri
ABŞ-la razılaşma ilk növbədə Ermənistanın KTMT-dən çıxmasının yekun rəsmiləşdirilməsinə
və Rusiya Federasiyası ilə müttəfiqlik münasibətlərinin dayandırılmasına gətirib
çıxarır. Moskvanın İrəvanın ən mühüm xarici siyasət tərəfdaşı kimi yerini bundan
sonra Vaşinqton, Paris və Brüssel tutacaq. Ermənistan və ABŞ arasında əldə
olunmuş razılaşmalar çərçivəsində Cənubi Qafqazda qeyri-regional oyunçuların -
Amerika qüvvələrinin simasında iştirakı artır. Bu, regionda bütün vəziyyətə təsir
edən və sabitliyi pozan amildir.
ABŞ təhlükəsizlik qüvvələrinin Ermənistandakı bir nömrəli hədəfi təbii
ki, İran olacaq.Tehran elə bir vəziyyətdədir ki, uzun illər İrəvana verdiyi dəstəyə
görə indi Ermənistanın simasında ABŞ-ın agentini qəbul edir. Bu, Tehran elitası
üçün çox xoşagəlməz faktdır. İrana təzyiq təkcə İsrail və Fars körfəzi ölkələri
tərəfindən deyil, həm də Ermənistan tərəfindən göstəriləcək. Burada İrana qarşı
casusluq üçün ABŞ-ın elektron kəşfiyyat bazalarının yerləşdirilməsi də gözləniləndir.
Əlbəttə, casusluq Cənubi Qafqazın bütün digər dövlətlərinə qarşı da aparılacaq.
Ona görə də bu bütün hallarda geriyə dönüşü olmayan bir addımdır. Nikol
Paşinyan son hərbi-siyasi seçimi ilə Qərbin “Troya atı”olmağı qəbul etdi. Bu, ABŞ
və Fransaya arxalanaraq öz hərbi əzələlərini Qərb vasitəsilə gücləndirmək ümidi
ölkəmiz üçün də yaçşı heç nə vəd etmir. Bu ən azından Ermənistanla Azərbaycan
arasında imzalanmalı olan sülh müqaviləsini ləngidəcək. Üstəlik, rəsmi İrəvan
yeni ritorikaları ilə gündəm yaratmaq istəyəcək. Bu da bütövlükdə Cənubi
Qafqazda sabitliyin pozulmasına rəvac verəcək.
Bu eyni zamanda Rusiyanı sürətlə Ermənistandan uzaqlaşdıracaq. Çünki, Rusiya
üçün Ermənistanla ABŞ arasında strateji tərəfdaşlıq sazişi yeni problemlərə yol
açacaq. Artıq bəzi məsələlər Rusiya üçün
gecdir. Çünki Qərb Ermənistanı nəinki qucağına çəkib, həm də bunu müvafiq siyasi və
digər razılaşmalarla, o cümlədən hərbi strukturların və xüsusi xidmət
orqanlarının qarşılıqlı fəaliyyətini rəsmiləşdirib. Cənubi Qafqazın digər ölkəsinin
regiona gəlişi regionun sabitliyi üçün təhdiddir. Bölgədən keçən ən mühüm dəhlizlərin
- həm "Şimal-Cənub", həm də "Şərq-Qərb" nəqliyyat
logistikasına da yeni təhlükələr var. İndi açıq-aydın, amerikalılar, fransızlar
və Avropa rəsmiləri Ermənistandan istifadə edəcəklər. Hər cür yolla Cənubi
Qafqazın sabitliyinə və normal inkişafına qarşı çıxış edəcəklər.