Bakı-Tbilisi-Bakı qatarının sevincdən çox gətirəcəyi BƏDBİNLİKLƏR

Bakı-Tbilisi-Bakı sərnişin qatarının fəaliyyətinin bərpa olunması hər kəsi sevindirdi. Nəhayət ki, uzun fasilədən sonra Borçalıda yaşayan soydşlarımız rahatlıqla ölkəmizə gəlib-gedəcək. Hələ Gürcüstanı gəzmək istəyənləri demirik.

Bir sözlə, bu müjdə hər kəsi məmnun saldı. Amma bəzi məqamlar sevincimizin üzərinə soyuq su kimi səpildi. Məsələn xəbərin yenə də qarşı tərəfdən yayılması təəssüf doğurdu.

Axı nəyə görə bu cür xəbərləri  biz özümüzün rəsmi dairələrimizdən yox, qarşı ölkənin mətbuatından öyrənməliyik. Deməli, bizdə ictimai fikirə önəm verilmir. Və bizim nə düşündüyümüz, nə yazmaq istəyimiz bəzi məmurlar üçün maraqlı deyil.

Belə olmasa idi xəbər rəsmi təsdiqini tapandan sonra “Azərbaycan Dəmir Yolları” QSC bir mətbuat konfransı keçirərdi və hər kəsi maraqlandıran suallara operativ və əhatəli cavab verilərdi.

Bu da edilmədi...

QSC rəhbərliyi təmkinini pozmadan qətiyyətlə susdu. Bu da o anlama gəlir ki, ictimaiyyətin düşüncələri və narahatlıqları onlar üçün zərrə qədər əhəmiyyət kəsb eləmir.

Bəs nə etdilər?

Adəti üzrə dəmir yol idarəsi öz xidmətlərini tərifləməyə başladı. Məlum oldu ki, siniflər üzrə səfər paketləri var, burada səyahətçilərə səfər boyu lazım olan gigiyenik vasitələr, şampun, duş geli eyni zamanda kişi səyahətçilər üçün təraş köpüyü təqdim olunur. Əlavə olaraq vaqonlarda televiziyalar quraşdırılıb, internet mövcuddur.

Hələ bu harasıdır...

Qatarda vaqon-restoran da olacaq. Amma qiymətlər barədə danışılmır. Çünki  vaqon-restoranda təqdim ediləcək qiymətlər heç də hər kəsin cibinə görə olmayacaq.

Bəs narazılıq doğuran səbəblər hansılardır?

İlk növbədə qiymətlər çox bahadır. Bakıdan Tbilisiyə getmək üçün bir təyyarə biləti qiymətinə pul xərcləmək lazım gələcək. Belə ki, ən ucuz bilet 81 manatdır. Digər biletlərin qiyməti barədə isə hələ ki, məlumat verilmir. Bu da o deməkdir ki, komfor+ və lüks vaqonlarda qiymətlər “əl yandıracaq”.

Hələ bu da son deyil.

Qatarda cəmi 6 vaqon olacaq. Onun da cəmi biri komfort-yəni ən aşağı sinifli vaqon olacaq. O vaqonda da qiymət 81 manat müəyyən edilib. Digər 4 vaqonda isə qiymətlər xeyli baha olacaq. Bir vaqonsa restoran kimi fəaliyyət göstərəcək.

Və ən pisi də odur ki, qatarla cəmi 118 sərnişin səyahət edə biləcək. Bu da ciddi narahatlıq doğurur. Çünki qatardakı sərnişin yerləri təyyarədəki sərnişin yerlərindən az olacaq. Bu da o anlama gəlir ki, qatar sosial sifarişi qətiyyən ödəməyəcək. Ancaq görüntü, bir az da kruiz xarakteri daşıyacaq. Sadə insanlar çətin ki, bu qatarın imkanlarından istifadə edə etsinlər. Heç bilet tapmaq mümkün olmayacaq.

Nəticədə bu layihə sonda ictimai rəğbət yox, ictimai qınaq qazanacaq. Bu da “Azərbaycan Dəmir Yolları” QSC-nin rəhbərliyini narahat edirmi?

İnanmırıq. Belə olsa idi heç olmasa sərnişin daşıyan vaqonların sayı 10-12 ədəd olardı. Gündə 200 adam bu xidmətdən yararlanardı.

News365.az