Bakı-Balakən dəmir yol marsrutu nə zaman işə salınacaq?

“Ötən həftə ADY-nin rəqəmsal transformasiyası ilə bağlı görüşdə bu məsələlər ətrafında da fikir mübadiləsi oldu. ADY rəsmilərinin Balakən - Tbilisi dəmir yolu layihəsi istiqamətində maraqlı açıqlamaları oldu. Görünən odur ki, ADY və hökumətdə zaman-zaman alternativ olaraq bu layihə nəzərdən keçirilir”.

Bunu News365.az–a açıqlamasında tanınmış ekspert Osman Gündüz deyib. O bildirib ki, hazırda Azərbaycan dəmir yolunun şimal-qərbdə son stansiyası Balakəndir:

“Bu stansiya ötən əsrin 80-ci illərinin əvvəllərində işə salınıb.  Xatırlayıram ki, mən o zaman raykom komsomolda çalışarkən bu xəttin tikintisndə işləmək üçün, köməklik üçün rayon gəncləri də səfərbər olunardı.

Balakən Dəmiryol Stansiyasından Gürcüstanla sərhəddəki Siteli-Sigaro Dəmir Yol Stansiyasına qədər məsafə isə 25-30 kilometrdir. Demək, cəmi 25 km-lik bir dəmir yolu xətti çəkməklə ölkəmiz Bakı - Balakən –Siteli-Sigaro - Tbilisi (550 km) kimi daha bir alternativ marşrut əldə etmiş olur.

Düşünrəm ki, belə bir strateji alternativ xətt yükdaşıma və sərnişindaşımada dayanıqlığın gücləndirilməsilə yanaşı, həm də regionun inkişafına xeyli müsbət təsir göstərə bilərdi”.

Müsahibimiz onu da əlavə edib ki, hazırda Bakı - Balakən marşrutunun Yevlaxadək olan hissəsi tam işlək vəziyyətdədr:

“Yevlax –Balakən dəmiyolunun uzunluğu isə160 km-dir. Məhz uzun illər bərbad vəziyyətdə olan sahə də bu xətt olub. Burada qatarın orta sürəti həmişə 35-40 km/saat olub. Elə vaxtlar olub ki, mən Şəki Stansiyasında qatardan düşüb Balakənə avtomobillə getmişəm və daha tez çatmışam.

Hazırda ADY rəhbərliyi məhz Yevlax-Balakən dəmir yol infrastrukturunun bərpası ilə bağlı bir neçə dəfə açıqlamalar verib. Ötən görüşdə də bu istiqamətdə işlərin sürətlə davam etdirildiyi, relslərin dəyişdirildiyi və yol işlərinin aparıldığı bildirilib. İşlərin başa çatmaqda olduğu bildirilib.

Əslində, düşünürəm ki, indiki zamanda bu hissədə dəmir yol xəttinin keçdiyi relyefi nəzərə alsaq daha böyük sürətlərə çatmağı hədəfləmək, mövcud dəmiryol stansiyalarını tam olaraq yenidən qurmağı planlamaq da doğru olmazdı. Bunlar daha böyük investisiyalar və daha böyük zaman tələb edərdi.

Fikrimcə Yevlax-Balakən hissəsində indiki anda 80 km/saat sürət də məqbul ola bilərdi. Eyni zamanda bu regiondakı yetərincə böyük dəmir yol stansiyalarının əvəzinə də modul tipli, daha modern, kiçik xidmət mərkəzləri işə salmaq olardı.

Ümid edirəm yaxın vaxtlara ADY Balakən istiqamətində bərpa işlərini tez başa çatdıracaq və 5 ildir işləməyən Bakı-Balakən dəmir yol marsrutunu işə salacaq”.

News365.az