“AzInTelecom”un idarəetmə strukturu dəyişir

“AzInTelecom” MMC-nin idarəetmə modelində dəyişiklik edilir.

News365.az xəbər verir ki, “APA-Economics”in əldə etdiyi məlumata görə, şirkət kollektiv idarəetmə formasından fərdi idarəetmə sisteminə keçir.

Belə ki, qurumda İdarə Heyəti, İdarə Heyətinin sədri və onun üzvləri vəzifələri ləğv edilir.

Dəyişikliyə əsasən, İdarə Heyətinin sədri vəzifəsini baş direktor əvəz edəcək. İdarə Heyətinin üzvləri isə fəaliyyətlərini baş direktorun müavinləri olaraq davam etdirəcək.

Nəticə etibarilə, bu vaxta qədər şirkətin İdarə Heyətinin sədri olmuş Elxan Əzizov qurumun baş direktoru, idarə heyətinin üzvü Sadiq Yolçuyev isə baş direktorun müavini olacaq.

“AzInTelecom” MMC-dən sorğumuza cavab olaraq bildirilib ki, struktur və təşkilati formada dəyişiklik baş verəcəyi təqdirdə, ictimaiyyətə məlumat veriləcək.

Xatırladaq ki, “AzInTelecom” MMC 2015-ci ildə Rəqəmsal İnkişaf və Nəqliyyat Nazirliyinin (RİNN) tabeli qurumu kimi yaradılıb, 2021-ci ildə Məlumat Hesablama Mərkəzi ilə birləşdirilərək strukturu yenidən təşkil olunub. Qurum 2024-cü ildən etibarən Azərbaycan Nəqliyyat və Kommunikasiya Holdinqinin (AZCON) tərkibində fəaliyyət göstərir. Şirkətin idarəetmə forması bu vaxta qədər ikipilləli kollektiv idarəçilik sistemindən ibarət olub. Qurumun fəaliyyətinə nəzarət Müşahidə Şurası, idarəçiliyi isə İdarə Heyəti tərəfindən həyata keçirilib.