Trampın yüksək vəzifə verdiyi türk həkim kimdir?
ABŞ Senatında keçirilən səsvermə nəticəsində tanınmış türk əsilli ürək cərrahı və televiziya siması Mehmet Öz "Medicare" və "Medicaid" Xidmətləri Mərkəzlərinin (CMS) direktoru vəzifəsinə təsdiq olunub.
News365.az xəbər verir ki, 53 lehinə, 45 əleyhinə səslə qəbul olunan bu qərar nəticəsində Mehmet Öz ABŞ-da federal səhiyyə siyasətinə rəhbərlik edəcək ilk türk əsilli şəxs kimi tarixə düşüb.
"Medicare" və "Medicaid" Xidmətləri Mərkəzləri ölkədə təxminən 160 milyon amerikalının səhiyyə xidmətlərini tənzimləyən ən vacib federal qurumlardan biridir. Bu qurum yaşlılara və aşağı gəlirli ailələrə tibbi xidmətlərin göstərilməsini təmin edir və illik büdcəsi 1 trilyon dollardan artıqdır.
Mehmet Cengiz Öz 1960-cı ildə Klivlend şəhərində türk valideynlərin ailəsində doğulub. Türkiyədə hərbi xidmətini yerinə yetirib. Harvard Universitetində təhsil alıb, daha sonra Pensilvaniya Universitetində tibb və biznes üzrə ikili magistr dərəcəsi qazanıb. Peşəkar fəaliyyətinə ürək-damar cərrahı kimi başlayan Öz uzun illər Nyu-York Presbiteryan Xəstəxanasında və Kolumbiya Universitetində çalışıb.
2000-ci illərin əvvəlində "Oprah Winfrey"in televiziya proqramında çıxışları ilə məşhurlaşan Öz sonradan özünün "The Dr. Oz Show" adlı şousunu quraraq geniş tamaşaçı auditoriyası qazanıb. Proqramda sağlam həyat tərzi və alternativ müalicə metodlarına dair mövzulara toxunsa da, bir çox dəfə "psevdoelmi" məzmunlara görə tənqid olunub. O, alternativ tibbə maraq göstərir və hipnoz, meditasiya və akupunktur kimi qeyri-ənənəvi müalicə üsullarını tibbi praktikasına daxil edib.
Pandemiya dövründə Öz malyariya əleyhinə dərman olan hidroksixloroxinin COVID-19-un müalicəsində effektiv olduğunu iddia edib və bu dərmanı dəstəkləyib. Lakin sonradan aparılan tədqiqatlar bu dərmanın COVID-19-a qarşı təsirli olmadığını göstərib və ABŞ Qida və Dərman Administrasiyası onun təcili istifadəsinə verilən icazəni ləğv edib.
Öz 2022-ci ildə Pensilvaniya ştatından Senata namizədliyini irəli sürüb, lakin seçkilərdə Demokrat namizədə uduzub. O, həmçinin COVID-19 pandemiyası dövründə Donald Trampa qeyri-rəsmi məsləhətçi qismində dəstək göstərib və bəzən mübahisəli müalicə təklifləri ilə gündəmə gəlib. Onun bacısı Seval Öz də texnologiya və nəqliyyat sahəsində tanınan mütəxəssislərdəndir. Seval Öz otonom nəqliyyat sistemləri sahəsində ixtisaslaşıb və ABŞ Nəqliyyat Nazirliyində rəhbər vəzifəyə namizəd göstərilib.
Qeyd edək ki, Öz ailəsi Türkiyənin Konya vilalətinin Bozkır qəsəbəsindəndir. Cəmi 25 885 nəfər əhalisi olan qəsəbə son aylarda bacı-qardaşa görə mediada məşhurlaşıb. Mehmet Özün Trampla yaxın əlaqələri var. O, bir müddət əvvəl imicini də dəyişib. Saçlarını sarıya boyadıb və özünü Trampa bənzədib.
2022-ci ilə olan məlumata görə, Mehmet Özün sərvəti təxminən 200 milyon dollar dəyərində qiymətləndirilir. 400-dən çox elmi məqalə, kitab fəsli və tibb kitabının müəllifidir.
