"Rüsum savaşı" pivə bazarını da "vurdu"

ABŞ-nin Avropadan idxal olunan pivəyə tətbiq etdiyi rüsum Hollandiyadakı pivə istehsalçılarının böyük narahatlığına səbəb olub. Onlar rüsumların azaldılmasını tələb edirlər. Bu barədə xarici KİV-ə Hollandiya Pivəçilər Assosiasiyasının (Nederlandse Brouwers) direktoru Meynt Vaterlander məlumat verib.

Pivə 25% alüminium rüsumu tətbiq edilən törəmə məhsulların siyahısına əlavə edilib.

Vaterlander qeyd edib ki, ABŞ Hollandiya pivə istehsalçıları üçün ən mühüm ixrac bazarıdır və ölkənin ümumi pivə ixracının 40 faizi xaricə göndərilir.

"Nəzərə alsaq ki, qiymətin formalaşması fermerləri, pivə zavodunun işçilərini, ictimai iaşə, logistika və limanları əhatə edir, o zaman pivə rüsumlarını azaldacaq həll yolu üzərində işləmək lazımdır",- deyə Hollandiya Pivəçilər Assosiasiyasının direktoru bildirib.

O, əlavə edib ki, Hollandiya ABŞ-yə həm şüşə qablarla yanaşı, alüminium qablarda da pivə göndərdiyi üçün assosiasiya hazırda alüminium rüsumlarına tabe olan məhsullara daha çox aydınlıq gətirməyə çalışır.

Aprelin 2-də Tramp ABŞ-nin Avropa İttifaqından gələn mallara 20%, Çindən gələn mallara isə 34% rüsum tətbiq edəcəyini açıqlamışdı. Ümumilikdə siyahıda 185 ölkə var. Bir sıra postsovet dövlətləri üçün rüsumlar fərqlidir. Maraqlıdır ki, Rusiya və Belarus bu siyahıya daxil edilməyib.

Tural