"Tayvan böhranı" böyüyür

Tayvan silahlı qüvvələri son 24 saat ərzində adaya yaxınlaşan Çin Xalq Azadlıq Ordusunun 12 təyyarəsi və 6 gəmisini qeydə alıb. Bu barədə Tayvan Müdafiə Nazirliyinin "X" sosial şəbəkəsindəki səhifəsində məlumat yayılıb. .

Qurumun məlumatına görə, Çin Xalq Azadlıq Ordusunun gəmiləri və təyyarələri yerli vaxtla səhər altıda aşkar edilib. 12 təyyarədən 9-u Tayvan boğazı üzərindən orta xətti keçərək Tayvanın cənub-qərb və şərq hava hücumundan müdafiə zonalarına daxil olub. Müdafiə Nazirliyinin açıqlamasında vəziyyəti diqqətlə izlədikləri və lazımi cavabın verildiyi vurğulanıb.

Martın sonunda ABŞ kəşfiyyatının qlobal təhdidlərə dair illik hesabatında Çinin hərbi potensialını xeyli surətləndirməsi barədə məlumat yayılmışdı. Məqsəd Çinin Tayvanla bağlı ABŞ ilə hərbi münaqişəyə girmə ehtimalıdır.

Aprelin 1-də Çin ordusu Tayvan ətrafında kompleks təlimlərə başlayıb. Çin Xalq Azadlıq Ordusu müxtəlif istiqamətlərdən gəmi və təyyarələrin Tayvana yaxınlaşmasını məşq etmək üçün əraziyə quru qoşunları, dəniz qüvvələri, hava qüvvələri, raket qüvvələri və digər qüvvələr göndərib.

Tural