Tramp prezidentliyinin ilk dəqiqələrində onlarla sənəd imzalayıb

ABŞ prezidenti Donald Tramp Ağ Evdə ilk iş günündə cəmi 47 dəqiqə 5 saniyə ərzində onlarla sənəd imzalayıb. Bu barədə xarici KİV məlumat yayıb.

ABŞ dövlət başçısı sərəncamları imzalayarkən jurnalistlərin suallarını da cavablandırıb. O qeyd edib ki, sələfi Cozef Bayden heç vaxt belə addım atmayıb.

Trampa digər məsələlərlə yanaşı, Ukraynadakı münaqişə, ABŞ-də TikTok sosial şəbəkəsinin bloklanması ilə bağlı məsələ, Qrenlandiyanı ölkəyə birləşdirmək niyyəti və Venesuela ilə münasibətə dair suallar verilib. Jurnalistlər həmçinin Trampın Rusiya prezidenti Vladimir Putinlə nə vaxt danışacağı və onun Çinə səfər etmək niyyətində olub-olmaması ilə maraqlanıblar.

Tramp ötən ilin noyabrın 5-də ABŞ-də keçirilən prezident seçkilərində inamlı qələbə qazanıb. Onun yanvarın 20-də keçirilən andiçmədən sonra təkcə xarici siyasət, diplomatiya ilə bağlı deyil, iqtisadiyyat və daxili siyasətlə bağlı da inqilabi dəyişikliklər edəcəyi gözlənilir.

Dünən isə ABŞ-nin 47-ci prezidenti and içərək vəzifəsinin icrasına başlayıb. Mərasim təxminən min nəfərin yerləşə biləcəyi Konqresin mərkəzi salonu olan Rotundada 40 ildən sonra ilk dəfə baş tutub. Respublikaçı siyasətçi Konstitusiyaya və iki İncil kitabına əlini qoyaraq andı içib.

Bununla da Tramp ABŞ tarixində fasilə ilə ən yüksək dövlət vəzifəsini tutan ikinci prezident olub. Əvvəllər buna yalnız Qrover Klivlend (1885-1889-cu illərdə və 1893-1897-ci illərdə) nail olmuşdu. Tramp hazırda ABŞ-ın 45-ci və 47-ci prezidentidir.

Tural