Rusiyanın Ermənistana müdaxilə ehtimalı realdır

Politoloqun sözlərinə görə, bu ssenari ən yüksək ehtimallı variant olmasa da, baş verəcəyi təqdirdə region üçün ən təhlükəli proseslərdən birinə çevrilə bilər.

Aydın Quliyev qeyd edib ki, Rusiya indiyədək bu cür addımlar üçün həm hüquqi baza formalaşdırıb, həm də müəyyən presedentlər yaradıb. O, Ukraynaya müdaxilə nümunəsini xatırladaraq bildirib ki, vaxtilə bir çoxları belə addımın mümkün olacağına inanmırdı.

Politoloq vurğulayıb ki, Ermənistanda Rusiyanın hərbi bazasının mövcudluğu Moskvanın regiondakı təsir imkanlarını artırır. Onun fikrincə, mümkün müdaxilə ilkin mərhələdə kibertəhlükə, informasiya hücumları və hibrid üsullarla başlaya, daha sonra isə hərbi mərhələyə keçə bilər.

Ekspert bildirib ki, Rusiyada son dövrlərdə qəbul edilən bəzi qanunlar da bu istiqamətdə diqqət çəkir. Həmin qanunlara əsasən, xarici ölkələrdə yaşayan Rusiya vətəndaşlarının və diaspor nümayəndələrinin hüquqlarının pozulduğu iddia edilərsə, Moskva onların müdafiəsi adı altında hərbi müdaxilə imkanını gündəmdə saxlaya bilər.

Aydın Quliyev hesab edir ki, bu hüquqi mexanizmlərin tətbiq oluna biləcəyi əsas istiqamətlərdən biri də Ermənistan ola bilər. Onun sözlərinə görə, Kreml regionda təsir imkanlarını qorumaq üçün müxtəlif ssenariləri nəzərdən keçirir.