“Rusiya 2022-ci il bəyanatının tələblərini pozur” Politoloqdan şərh
Azərbaycan və Rusiya arasında münasibətlər strateji tərəfdaşlıq və bərabərhüquqlu əməkdaşlıq əsasında qurulsa da, son dövrlərdə bu prinsiplər Rusiya tərəfindən pozulur.
Bu fikirləri politoloq Xəyal Bəşirov News365.az-a açıqlamasında bildirib.
O xatırladıb ki, 2022-ci il fevralın 22-də – Rusiyanın Ukraynaya hərbi müdaxiləsindən bir gün öncə – Azərbaycan və Rusiya prezidentləri arasında qarşılıqlı fəaliyyətə dair 43 maddəlik sənəd imzalanıb. Lakin həmin sənədin müddəalarının pozulması halları daha çox Rusiya tərəfindən müşahidə olunur:
“Azərbaycan hərbi təyyarəsinin vurulması, nəticədə vətəndaşlarımızın həlak olması, bu hadisə ilə bağlı heç bir araşdırmanın aparılmaması, həmçinin Azərbaycanın informasiya məkanına kiberhücumların təşkil olunması bu sənədin pozulmasıdır. Eləcə də Rusiyada – başda Yekaterinburq olmaqla – azərbaycanlılara qarşı etnik zorakılıqların təşkil olunması və rəsmi dairələrin bununla bağlı mövqe bildirməməsi narahatlıq doğurur,” – deyə politoloq bildirib.
Bəşirov əlavə edib ki, Rusiya mediası və bəzi rəsmi şəxslər tərəfindən səsləndirilən anti-Azərbaycan ritorikası da ikitərəfli münasibətlərə ciddi zərbə vurur.
“Əgər Rusiya, doğrudan da, 2022-ci il bəyanatının imzalandığı dövrdəki münasibətlərə qayıtmaq istəyirsə, Azərbaycanın haqlı və açıq tələblərinə əməl etməlidir,” – deyə politoloq qeyd edib
