“Ronaldo artıq Portuqaliya millisinin yükünə çevrilib” – sərt tənqid

Portuqaliya millisinin və “Əl-Nəsr”in ulduzu Kriştiano Ronaldo 41 yaşında da futbol karyerasını davam etdirir. Lakin onun hazırkı forması və milli komandadakı rolu ilə bağlı sərt fikirlər səsləndirilib.

News365.az xəbər verir ki, jurnalist Ceremi Kross Ronaldonun yaşını qəbul etmək istəmədiyini və əvvəlki səviyyəsini qorumaqda çətinlik çəkdiyini iddia edib.

Onun sözlərinə görə, son Dünya Çempionatı Ronaldonun hazırkı vəziyyətini açıq şəkildə ortaya qoyub:

“Ronaldo 41 yaşına gəlib. Amma bunu qəbul etmək istəmir. O, hələ də keçmişdə qazandığı uğurlara söykənən futbolçudur. Artıq ən yüksək səviyyədə nəticə verə bilməyəcək qədər geridə qalmış bacarıqlarına güvənərək reallaşdırması mümkün olmayan vədlər verməyə çalışır”.

Kross Ronaldonu Dünya Çempionatında komanda oyunu baxımından da tənqid edib. Onun fikrincə, futbolçu bəzi epizodlarda həddindən artıq fərdi davranıb və bu, Portuqaliyanın turnirdəki nəticəsinə mənfi təsir göstərib.

Jurnalist Roberto Martinesin Ronaldoya həddindən artıq güzəştə getdiyini də iddia edib:

“Roberto Martines Ronaldonun istədiyi hər şeyi etdi və bunun əvəzini ağır ödədi. Jorje Jesus isə Martinesin səhvlərindən nəticə çıxarıb və onları təkrarlamaq niyyətində deyil”.

Kross Ronaldonun emosional davranışlarını da tənqid edib. Onun sözlərinə görə, futbolçu istədiyi nəticəni əldə edə bilmədikdə buna qarşı aqressiv reaksiya göstərir.

Jurnalist hesab edir ki, Portuqaliya millisinin rəhbərliyi Ronaldonun komandadakı rolunu yenidən qiymətləndirməlidir.

“Portuqaliya millisində qərar verənlər gözlərini açmalı və Ronaldonun artıq komanda üçün yükə çevrildiyini anlamalıdırlar”, – deyə Kross bildirib.

Qeyd edək ki, Ronaldo 41 yaşında olmasına baxmayaraq, Portuqaliya millisinin əsas simalarından biri olaraq qalır. Onun milli komandadakı gələcək rolu isə qarşıdakı turnirlər öncəsi əsas müzakirə mövzularından biridir.