Rəsmilərimiz qarşı tərəfi emosional mübahisədə məğlub etmədi, həm də dövlətin mövqeyini təmkinli şəkildə ifadə etdi

Xəbər verdiyimiz kimi İranın xüsusi xidmət orqanları ilə sıx əlaqələri ilə bilinən xaricdə yaşayan bloger Ələmdar Bünyadov Almaniyada səfərdə olan Azərbaycanın nümayəndə heyətinə yaxınlaşaraq əsassız iddialar səsləndirib.

Prezidentin köməkçisi Hikmət Hacıyev və xarici işlər naziri Ceyhun Bayramov əvvəlcə onu dinləyib, sonra cavabını veriblər.

“Qeyd etdiyiniz məsələlər sizin şəxsi qənaətinizdir və şəxsi qənaətinizi həqiqət kimi təqdim etməyiniz qəbuledilməzdir.

Bununla bağlı Azərbaycanın hüquq-mühafizə orqanları tərəfindən qərar qəbul olunubsa, bu qərara dair onun apelyasiyaya və kassasiyaya təqdim edilməsinin də öz qaydaları var. İşgəncələrlə bağlı dedikləriniz sizin mülahizənizdir. Mən əminəm ki, Azərbaycanda işgəncə tətbiq edilə bilməz, xüsusi olaraq qadınlara qarşı. Ümumilikdə bu mümkünsüzdür”, - Ceyhun Bayramov blogerin təxribat xarakterli sualına cavab verib.
“Hamısının kimin tərəfindən maliyyələşdirildiyini bilirsiniz? Məsələyə xüsusi obyektiv yanaşın. Siz Almaniyada hansı statusda yaşayırsınız? Azərbaycandan nəyə görə getmisiniz? Deyin, gəlin dinləyək bir-birimizi. Azərbaycanın suverenliyi və milli təhlükəsizliyi hər şeydən dəyərlidir”, - Hikmət Hacıyev əlavə edib.

Almaniyada Azərbaycanın xarici işlər naziri Ceyhun Bayramov ilə bloger arasında baş tutan qısa dialoq sosial şəbəkələrdə geniş müzakirələrə səbəb oldu. Bir neçə dəqiqə davam edən söhbət göstərdi ki, müasir dövrdə diplomatiya təkcə danışıqlar masasında deyil, kameralar qarşısında da sınaqdan keçir.

Dialoq zamanı bloger sərt və tənqidi suallar səsləndirsə də, Ceyhun Bayramov emosional polemikaya girmədən cavab verməyə üstünlük verdi. Bu yanaşma klassik diplomatik davranışın əsas xüsusiyyətlərindən biri hesab olunur. Diplomatiyada əsas məqsəd qarşı tərəfi emosional mübahisədə məğlub etmək deyil, dövlətin mövqeyini ardıcıl və təmkinli şəkildə ifadə etməkdir.

İctimai rəy baxımından əksər izləyici nazirin sakit davranışını peşəkarlıq və özünəinam nümunəsi kimi qiymətləndirir.

Siyasi kommunikasiya baxımından isə ən diqqətçəkən məqam emosiyaların deyil, təmkinin üstünlük qazanması idi. Dövlət rəsmilərinin beynəlxalq platformalarda hər bir ifadəsi təkcə şəxsi mövqe deyil, həm də təmsil etdikləri dövlətin imici kimi qəbul olunur. Bu səbəbdən ölçülü-biçili ünsiyyət diplomatik fəaliyyətin vacib elementidir.

Nəticə etibarilə, Almaniyada baş vermiş bu dialoq bir daha göstərdi ki, informasiya mübarizəsində bəzən yüksək tonlu mübahisədən daha çox sakitlik, arqument və özünənəzarət diqqət çəkir. Məhz buna görə həmin söhbət qısa olmasına baxmayaraq, uzun müddət ictimai müzakirələrin mövzusu olaraq qaldı.

News365.az