Prokurorluq erməni generaldan 11 milyon dollar tələb edir – Təfərrüatlar

Ermənistanın Baş Prokurorluğu məhkəmədən Silahlı Qüvvələrin Baş Qərargahının keçmiş rəisi Movses Akopyan və Silahlı Qüvvələrin Raket Qoşunları və Artilleriya İdarəsinin keçmiş rəhbəri Armen Arutyunyandan 4,5 milyard dram (təxminən 11 milyon dollar-red.) tələb edir.

Yerli medianın yaydığı məlumata görə, nəzarət orqanı bu vəsaitlərin mənşəyini qanunsuz hesab edir. İş 9 il əvvəl Rusiyadan ümumi dəyəri 4,3 milyard dram olan istifadəyə yararsız olduğu iddia edilən 15 RLS-in alınması ilə bağlıdır: "İş materiallarına görə, kiçik “Aistenok” radarlarının tədarükü ilə bağlı müqavilə Akopyan müdafiə nazirinin müavini və maddi-texniki təchizat departamentinin rəhbəri olduğu vaxt 2016-cı ilin iyulunda imzalanıb. İş materialları bu yaxınlarda məhkəməyə verilib".

Prokurorluğun məlumatına görə, sözügedən texnika keyfiyyətsizdir və bu günə kimi istifadə olunmayıb.

Qeyd edək ki, hələ 2022-ci ilin iyununda Ermənistanın Milli Təhlükəsizlik Xidməti Arutyunyanın istifadəyə yararsız raketlərin alınması işi ilə bağlı saxlanılması barədə məlumat vermişdi. Üç il sonra, 2025-ci ilin martında mətbuat keçmiş yüksək vəzifəli məmurun bəraət alması barədə məlumat yaydı.

Tural