AB ABŞ-ın yeni rüsumlarına cavab verəcək - Gill

Avropa Birliyi ABŞ-ın elan edəcəyi yeni rüsumlara cavab verəcək, lakin bu, uyğun zamanda baş verəcək.

News365.az xəbər verir ki, bunu Avropa Komissiyasının nümayəndəsi Ulof Gill bildirib.

Gill qeyd edib ki, AB hazırda "gözləmə rejimindədir", lakin artıq rüsumların mümkün təsirini təhlil edib.

Onun sözlərinə görə, cavab iki mərhələdən ibarət olacaq. Birinci mərhələ artıq qüvvədə olan polad və alüminium rüsumlarına aid olacaq, ikinci isə digər bütün sahələri əhatə edəcək:

“Hazırda birinci mərhələ daxili müzakirələr mərhələsindədir, ikinci isə gözlənilən elan edildikdən sonra ictimaiyyətə təqdim olunacaq”.

Qeyd edək ki, daha öncə Avropa Komissiyasının rəhbəri Ursula fon der Leyen bəyan edib ki, Avropa Birliyinin ABŞ Prezidenti Donald Trampın tətbiq etdiyi rüsumlara qarşı güclü planı var, lakin AB danışıqlara üstünlük verir.

Tramp çərşənbə günü bütün dünyadan idxal edilən mallara rüsum tətbiq edəcəyi ilə hədələyib. Mart ayında onun administrasiyası polad və alüminium idxalına rüsumlar tətbiq edib və cümə axşamı avtomobillərə tətbiq ediləcək yeni rüsumların qüvvəyə minəcəyini bəyan edib.