Məşhur jurnalist saxta transfer xəbərinə görə saxlanılıb- FOTO

Türkiyəli jurnalist Burhan Can Terzi Almaniya milli komandasının və Münhen "Bavariya"sının yarımmüdafiəçisi Camal Musialanın Türkiyənin "Qalatasaray" klubuna transferi barədə sosial media hesabında informasiya yaydığına görə saxlanılıb.

News365.az xəbər verir ki, bu barədə İHA-məlumat yayıb.

Məlumata görə, Musialanın transferi iddiaları ilə bağlı paylaşımından sonra Burhan Can Terzi barəsində İstanbulun Bakırköy Prokurorluğu tərəfindən istintaq başlanıb. Jurnalist istintaq çərçivəsində "İctimaiyyətə açıq şəkildə yalan məlumat yaymaq" ittihamı üzrə nəzarət altına alınıb.

Lazımi prosedurlar tamamlandıqdan sonra o, məhkəmə orqanlarına göndəriləcək.

Qeyd edək ki, Burhan Can Terzi daha əvvəl Musialanın "Qalatasaray"a keçəcəyi barədə məlumat verib. Türkiyə klubu bu məlumatı təkzib edən rəsmi açıqlama yayıb. Həmçinin məlum olub ki, "Qalatasaray" prokurorluğa şikayət ərizəsi verib.