İşçilərə ŞAD XƏBƏR: Bayram günlərində maaş və əlavə ödəniş ala bilərsiniz

Bayram ərəfəsində bəzi iş yerlərində əməkdaşlara avans verilməsi məsələsi gündəmə gəlir. Maraqlıdır, bayram günlərində əməkdaşlara avans verilməsi qanunla tənzimlənirmi? Ümumiyyətlə, bayramda işçiyə avans verilməlidirmi?

Məsələnin hüquqi tərəfi ilə bağlı vəkil Ramil Süleymanov danışıb.

Vəkilin sözlərinə görə, avans əməkhaqqının müəyyən hissəsi sayıldığından, onun verilməsinə dair qanunvericilikdə heç bir məhdudiyyət mövcud deyil. Bu səbəbdən işəgötürən əməkdaşın maaşının bir qismini avans şəklində rahatlıqla təqdim edə bilər.

“Qanunvericilikdə məhdudiyyət qoyulmayan məsələlərdə işçiyə maaşının bir hissəsinin əvvəlcədən verilməsi tam mümkündür. Həmçinin Əmək Məcəlləsində göstərilir ki, əməkhaqqı ay ərzində bir və ya iki dəfə verilə bilər,” – Ramil Süleymanov vurğulayıb.

Beləliklə, bayram günlərində avans verilməsi həm qanuni, həm də praktik olaraq icra edilə bilən bir prosesdir. /// KONKRET.az