İran İsraili TƏHDİD etdi

İran Xarici İşlər Nazirliyinin sözçüsü Livanın "Əl-Əxbar" nəşrinə müsahibəsində regional gərginliyin həlli ilə bağlı Tehranın prinsipial mövqeyini açıqlayıb. O, imzalanmış son sənədlərin və razılaşmaların mahiyyətinə toxunaraq, İsrailin Livan torpaqlarında mövcudluğunu davam etdirdiyi müddətcə müharibənin başa çatmış sayılmayacağını bildirib.

News365.az xarici mediaya istinadən xəbər verir ki, XİN rəsmisi sənədin Livanın suverenliyini və ərazi bütövlüyünü təmin etmək öhdəliyini daşıdığını vurğulayıb. Onun sözlərinə görə, bu, işğalçı qüvvələrin Livan ərazisini dərhal tərk etməsi mənasına gəlir. İran müharibənin sona çatmasına hazır olsa da, "sionist düşmən" Livan torpaqlarında qaldıqca bu mübarizənin davam edəcəyi bəyan edilib.

İranın İsrailə qarşı mövqeyində heç bir dəyişikliyin olmadığını xüsusi qeyd edən nazirlik sözçüsü, bununla belə, Tehranın düşmənçilik etməmək barədə öhdəlik götürdüyünü təsdiqləyib: "Bu öhdəlik həm İranı, həm də onun sərhədlərindən kənarda olan müttəfiqlərini əhatə edir. Sənəddə İsrailin adı çəkilmir və bizim 'cinayətkar rejim' adlandırdığımız quruma münasibətimiz əvvəlki kimi qalır. İmzalanan müqavilə sadəcə bir tərəfdə ABŞ və müttəfiqləri, digər tərəfdə isə İran və onun müttəfiqləri arasında müharibənin dayandırılmasını nəzərdə tutur".

Bu bəyanat Tehranın regional razılaşmalara yanaşmasında iki fərqli xətti ortaya qoyur: diplomatik səviyyədə müharibənin dayandırılması barədə öhdəliklərin qəbul edilməsi və ideoloji səviyyədə İsrailə qarşı barışmaz mövqeyin qorunub saxlanılması.