Ərzaq qiymətləri 2026: Artım gözlənilir – ŞƏRH
Parlamentdə gələn ilin büdcə müzakirələri davam edir. Hazırda maraqlı məsələlərdən biri gələn il inflyasiyanın neçə faiz olacağı, eləcə də ərzaq qiymətlərində artımların baş verib-verməyəcəyilə bağlıdır. Əksər ekspertlər gələn ildə qiymət artmının olacağını proqnozlaşdırırlar. İnflyasiyanın isə rəsmi göstəricilərə əsasən bu illə müqayisədə daha az olması gözlənilir.
Milli Məclisin İqtisadi siyasət, sənaye və sahibkarlıq komitəsinin üzvü Vüqar Bayramov bildirib ki, gələn infyasiya göstəricilərinin bu ilə müqayisədə daha aşağı olması proqnozlaşdırılır:
“Rəsmi proqnoza əsasən 2026-cı ildə inflyasiya səviyyəsi 2025-ci illə müqayisdə daha aşağı olacaq. Mərkəzi Bank 2025-ci ildə 6, 2026-cı ildə isə 5,7 faiz inflyasiya proqnozlaşdırıb”.
Deputat ərzaq məhsullarının qiymətlərinin gələn il artıb-artmayacağı ilə bağlı isə bunları deyib:
“Növbəti il ərzaq məhsullarının qiymətlərində dəyişiklik birbaşa idxal inflyasiyasından aslı olacaq. Həm monitorinqlər, həm də qiymətləndirmələr xarici ölkələrdəki məhsulların qiymətlərindəki dəyişikliklərin birbaşa yerli istehlak məhsullarına təsirinin olduğunu göstərir. O baxımdan növbəti ildə əsas hədəflərdən biri idxal inflyasiyasının tənzimlənməsi, optimallaşdırılması və yerli istehlak bazarına təsirlərinin minimumlaşdırılması olacaq. Bu kontekstdən ərzaq məhsullarının qiymətlərində dəyişiklik birbaşa təbii ki, ərzaq məhsulları aldığımız ölkələrdəki qiymət səviyyəsindən asılı olaraq dəyişəcək. Təbii ki, yerli istehsalın genişləndirilməsi, ərzaq məhsullarına tələbin daha çox yerli istehsal hesabına ödənməsi prioritet olaraq qalır. Bu istiqamətdə atılan addımlar bütövlükdə ərzaq məhsullarının qiymətlərinin optimallaşdırılmasına və idxaldan asılılığın azaldılmasına gətirib çıxara bilər”.
