Daşkəndin xüsusi iqtisadi zonasına Səidə Mirziyoyeva rəhbərlik edəcək

Özbəkistan Prezidenti Qızını Xüsusi İqtisadi Zonaya Rəhbər Təyin Etdi

Özbəkistan Prezidenti Şövkət Mirziyoyev ölkəyə xarici investisiya cəlb etmək səyləri çərçivəsində nüfuzlu qızı Səidə Mirziyoyevanı paytaxt Daşkənddə yaradılması planlaşdırılan xüsusi iqtisadi zonaya rəhbər təyin edib.

News365.az xəbər verir ki. 41 yaşlı Səidə Mirziyoyeva 2025-ci ildən atasının administrasiyasına rəhbərlik edir və eyni zamanda Özbəkistan Təhlükəsizlik Şurasının sədr müavinidir. “Reuters”in məlumatına görə, ötən ay qəbul edilmiş konstitusiya qanununa əsasən, o, ömürlük məhkəmə toxunulmazlığı əldə edib.

Özbəkistan rəhbərliyi 40 milyona yaxın əhalisi olan Mərkəzi Asiyanın ən sıx məskunlaşmış bu ölkəsində siyasi nəzarəti tam əlində saxlasa da, son illərdə fəal iqtisadi islahatlar proqramı həyata keçirir. 2016-cı ildə hakimiyyətə gələn Şövkət Mirziyoyev, Sovet İttifaqının süqutundan ölümünə qədər ölkəni idarə edən sələfi İslam Kərimovun dövründə tətbiq olunmuş bir çox iqtisadi məhdudiyyətləri ləğv edib. Səidə Mirziyoyeva isə atasının baş müşaviri kimi bu islahatları fəal şəkildə dəstəkləyir.

Prezident Mirziyoyev iyun ayında "Daşkənd Beynəlxalq Maliyyə Mərkəzi" kimi tanınan xüsusi iqtisadi zonanın açılması planını elan etmişdi. Vergi və gömrük rüsumlarından azad olan bu ərazinin ingilis ümumi hüquq (English common law) prinsipləri əsasında idarə olunması nəzərdə tutulur.

Dövlət Statistika Komitəsinin məlumatına görə, Özbəkistan iqtisadiyyatı 2026-cı ilin birinci yarısında 8,5% artaraq keçmiş Sovet məkanında ən sürətli artım tempini qoruyub saxlayıb.

Siyasətçilərin öz yaxın qohumlarını yüksək vəzifələrə təyin etməsi isə kommunizmin süqutundan sonra Mərkəzi Asiya regionunda idarəetmənin adi halına çevrilib.

News365.az